Թագուհի Թովմասյան. Ի գիտություն Արթուր Բաղդասարյանի

Արդեն որերորդ անգամ առիթ ունեցել եմ համոզվելու, որ երբ «Ժողովուրդ» օրաթերթում որեւէ հրապարակում է լինում ՕԵԿ-ի կամ նորաթուխ պատգամավոր Լեւոն Դոխոլյանի` հայտնի քույրիկ Լեւոնի մասին, անմիջապես ֆեյսբուքյան կեղծ օգտատերերի միջոցով իմ հասցեին լկտի հայհոյանքներ են գրվում եւ տարածվում համացանցում:

Իհարկե, չէի անդրադառնա այդ ճղճիմ քայլին, եթե ՕԵԿ-անբարո էժանագին արարքները չբարկացնեին իմ ընկերներին, որոնց խնդրանքով եւ անում եմ այս հայտարարությունը: «Ժողովուրդ» օրաթերթի դեմ «Օրինաց երկիր» կուսակցությունը հայց է ներկայացրել դատարան ու պահանջում է 7 մլն դրամ` որպես փոխհատուցում այն բանի, որ մենք գրել ենք «ԱԽՔ Արթուր Բաղդասարյան» կամ «էգ առյուծ Հեղինե Բիշարյան»:

Բայց իրավական ձեւակերպումներին անդրադառնալու առիթ կունենամ: Այժմ ցանկանում եմ ՕԵԿ նախագահ Արթուր Բաղդասարյանին զգուշացնել, որ եթե դուք ձեր մանրադրամի մակարդակի լածիրակ-ֆեյքերին չսանձեք եւ շարունակվի իմ նկատմամբ հայհոյանքների տարածումը, ուրեմն իրավական մի լայնածավալ գործընթաց կսկսեմ ՕԵԿ-ի դեմ: Տղամարդուն վայել չէ կեղծ էջերի տակ թաքնվելով հայհոյելը: Սա ընդամենը ցույց է տալիս, որ ՕԵԿ-ը փողոցային մի կառույց է, որը ունակ չէ շիտակ կռիվ տալու: «Ժողովուրդ» օրաթերթը շատ շատերի կոշտուկներն է տրորում, բայց այսպիսի փողոցային մակարդակով արձագանք երբեք չենք ստացել:

Ի դեպ, դեռեւս ճշտվող տեղեկություններով, իմ մասին կեղտոտ տեքստեր տարածողը Հեղինե Բիշարյանի որդին է` Կարենը եւ Լեւոն Դոխոլյանը, որոնց միանում են ԱԺ ՕԵԿ փորձագետներն ու քարտուղարուհիները:
Առայժմ այսքանը:

ԺՈՂՈՎՈՒՐԴ օրաթերթի գլխավոր խմբագիր
ԹԱԳՈՒՀԻ ԹՈՎՄԱՍՅԱՆ