Կոմունիստական դժոխք. Չեռնոգորիայում եկեղեցական որմնանկարում Մարքսը, Էնգելսն ու Տիտոն պատկերվել են դժոխքում
Չեռնոգորիայի մայրաքաղաք Պոդգորիցայի եկեղեցիներից մեկում որմնանկար է հայտնվել, որտեղ կոմունիստական գաղափարախոսներԿարլ Մարքսը, Ֆրիդրիխ Էնգելսը եւ հարավսլավական կոմունիստների առաջնորդ Բրոզ Տիտոն այրվում են դժոխքի կրակների մեջ:
Նոր` «Հարություն» կոչվող եկեղեցում գտնվող որմնանկարն արդեն վեճերի տեղիք է տվել, հաղորդում է Agence France-Presse-ը:
«Մարքսը, Էնգելսն ու Տիտոն մարմնավորում են կոմունիստական չարիքը Բալկաններում եւ ողջ աշխարհում»,- ասել է եկեղեցու հոգեւորականը: Նրա կարծիքով` որմնանկարի հեղինակն իրավունք ունի պատկերել իրերն այնպես, ինչպես հարկ է համարում: Միաժամանակ նա նկատել է, որ նկարիչն, իհարկե, իրավունք չունի որոշել, ում ուղարկել դժոխք, ում` դրախտ:
Հոգեւորականների տեսակետները եւս կիսվել են. մի մասը կարծում է, որ եկեղեցին իրավունք չունի խառնվել աշխարհիկ գործերին, մյուսները կարծում են, որ կոմունիզմը չափազանց մեծ չարիք է պատճառել:
