Հասան Նասրալլահը Թեհրանին զգուշացրել է Բեյրութում Իրանի դեսպանատան դեմ հնարավոր նոր ահաբեկչությունների մասին
Իրանական Fars լրատվական գործակալության փոխանցմամբ՝ լիբանանյան «Հզբոլլահ» շարժման առաջնորդ Հասան Նասրալլահը զգուշացրել է Բեյրութում Իրանի դեսպանատան դեմ հնարավոր նոր ահաբեկչությունների մասին:
Իրանի փոխարտգործնախարար Հոսեին Ամիր Աբդոլահիանի հետ հանդիպման ժամանակ Նասրալլահը հայտարարել է, որ այդպիսի ակտերը շարունակվելու են, քանի որ թշնամիները ցանկանում են այդ կերպ փոխհատուցել մի շարք դեպքերում և մասնավորապես Սիրիայում իրենց անհաջողությունները:
Նասրալլահի խոսքերով՝ Բեյրութում իրանական առաքելության դեմ ահաբեկչական հարձակումը պլանավորված է եղել նախապես, և որ դրա գլխավոր նպատակը եղել է դեսպանատան շենքի ու դարպասների ամբողջովին ոչնչացումը: Նոյեմբերի 19-ին Բեյրութում իրականացված կրկնակի ահաբեկչության ժամանակ զոհվել է 23 և վիրավորվել է 146 մարդ:
