Եգիպտոսում արգելվել են առանց ոստիկանության թույլտվության բողոքի ակցիաները
Բրիտանական Reuters լրատվական գործակալության փոխանցմամբ՝ Եգիպտոսի նախագահի պաշտոնակատար Ադլի Մանսուրը հրաման է ստորագրել, որով արգելվում են, առանց ոստիկանության կողմից նախնական թույլտվության, հանրահավաքների ու բողոքի զանգվածային այլ ակցիաների անցկացումը:
Իրավապաշատպաններն արդեն իսկ հայտարարել են, որ նոր օրենքը սահմանափակում է ազատ հանրահավաքներ անցկացնելու քաղաքացիների իրավունքները: Նրանց կարծիքով՝ իշխանությունները փաստացիորեն արգելում են բողոքի խաղաղ ակցիաները և ոստիկանությանն օժտում են առանց ծանրակշիռ պատճառների դրանց մասնակիցներին ցրելու իրավունքով:
Օրենքը ստորագրվել է Եգիպտոսի նոր Սահմանադրության վերաբերյալ հանրաքվեի անցկացումից քիչ առաջ: Բացի այդ, 2014 թվականին Եգիպտոսում տեղի են ունենալու նախագահական ու խորհրդարանական ընտրություններ:
Հիշեցնենք, որ նոյեմբերի սկզբին Եգիպտոսի արտգործնախարար Նաբիլ Ֆահմին հայտարարել էր, որ երկրում խորհրդարանական ընտրություններն անցկացվելու են հաջորդ տարվա փետրվար-մարտին, իսկ նախագահական ընտրությունները՝ հաջորդ տարվա ամռան սկզբին:
