Գերմանիայի հատուկ ծառայությունները ՌԴ դեսպանատան աշխատակիցներին կասկածում են լրտեսության մեջ
Deutsche Welle-ի փոխանցմամբ՝ գերմանական հակահետախուզությունը կասկածներ ունի, որ Բեռլինի կառավարական թաղամասում գտնվող Ռուսաստանի դեսպանատունը զբաղված է լրտեսական գործունեությամբ: Դեսպանատան շենքի տանիքին տեղադրվել է փայտյա տնակ, որում, ամենայն հավանականությամբ, գտնվում են գաղտնալսող սարքեր:
Այս մասին հայտնել է Գերմանիայի անվտանգության մարմիններում եղած աղբյուրը: Օդից կատարված լուսանկարները ցույց են տվել, որ Ռուսաստանի դեսպանատան հետին կողմում գտնվում է փայտե կառույց, որը գերմանական անվտանգության մարմիններում հայտնի է որպես «ռուսական խրճիթ»: 1990-ական թվականներին կատարված լուսանկարներում բացակայում էր փայտե կառույցը:
Աղբյուրի խոսքերով՝ գերմանական հակահետախուզության աշխատակիցներն արդեն մի քանի տարի է, ինչ ենթադրում են, որ ռուս դիվանագետներն այդ տեխնիկայի օգնությամբ դիտարկում են իրականացնում գերմանացի քաղաքական գործիչների հանդեպ: Աղբյուրը չի ներկայացրել կոնկրետ ապացույցներ:
