ԱՄՆ-ը համաձայնվել է, որ Patriot համակարգերը ևս մեկ տարով մնան Թուրքիայում
Ամերիկյան The Associated Press լրատվական գործակալության փոխանցմամբ՝ ԱՄՆ պաշտպանության նախարար Չակ Հեյգելը հայտարարել է, որ ԱՄՆ-ի տրամադրած և Թուրքիայի տարածքում տեղակայված Patriot զենիթա-հրթիռային երկու համալիրները ևս մեկ տարով կմնան Թուրքիայի տարածքում՝ կապված Սիրիայում շարունակվող բախումների ժամանակ Թուրքիայի հակաօդային պաշտպանությունն ապահովելու հետ:
Պենտագոնի մամլո քարտուղար Կառլ Վուտը մանրամասնել է, որ Հեյգելն այդ մասին հայտարարել է ԱՄՆ-ում գտնվող Թուրքիայի արտգործնախարար Ահմեթ Դավութօղլուի հետ բանակցելուց հետո: Հենց թուրքական կողմն է պնդել, որ երկարաձգվի Patriot համակարգերի մնալու ժամկետը: Հեյգելն ու Դավութօղլուն քննարկել են նաև Սիրիայի քիմիական զինանոցի ոչնչացման հարցը:
Հիշեցնենք, որ մոտ մեկ շաբաթ առաջ Թուրքիան դիմել էր ՆԱՏՕ-ին՝ խնդրելով մեկ տարով երկարաձգել երկրին հատկացված Patriot զենիթա-հրթիռային վեց համալիրների տեղակայման ժամկետը:
