Ալբանիան հրաժարվել է ընդունել ոչնչացման ենթակա Սիրիայի քիմիական զենքը
Բրիտանական Reuters լրատվական գործակալության փոխանցմամբ՝ Ալբանիայի իշխանությունները հրաժարվել են ընդունել Սիրիայի քիմիական զենքը՝ այն ոչնչացնելու նպատակով: Այս մասին երեկ հայտարարել է Ալբանիայի վարչապետ Էդի Ռամին: Վերջինս մերժման որոշումը պայմանավորել է անհրաժեշտ հնարավորությունների բացակայությամբ:
Ավելի վաղ Սիրիայի քիմիական զենքի ոչնչացմանը Ալբանիայի մասնակցության մասին լուրը հարուցել էր ալբանական ընդդիմության դժգոհությունը և հանգեցրել էր փողոցային ակցիաների առաջացմանը:
Սիրիայի քիմիական զենքը Ալբանիայի տարածքում ոչնչացնելու մասին առաջարկով հանդես էր եկել ԱՄՆ-ը, ինչը տեղի էր ունեցել այն բանից հետո, ինչ սիրիական քիմիական զինանոցն իրենց տարածքում ընդունել հրաժարվել էին Թուրքիայի, Հորդանանի ու Նորվեգիայի իշխանությունները:
Սիրիայի քիմիական զինանոցը պետք է վերջնականապես ոչնչացվի 2014 թվականին:
