Եվրոասոցացման գործընթացը կշարունակվի միայն Վրաստանի և Մոլդովայի համար. Արման Մելիքյան
ԼՂՀ նախկին արտգործնախարար Արման Մելիքյանը ֆեյսբուքի իր էջում գրել է.
«Գուցե դեպքերից փոքր-ինչ առաջ եմ ընկնում, սակայն, ինչպես երևում է, եվրոասոցացման գործընթացը կշարունակվի միայն Վրաստանի և Մոլդովայի համար: Ինքս համոզմունք ունեմ, որ նախկին Խորհրդային Միության տարածքի ռազմաքաղաքական և տնտեսական վերահսկողությունն ու պատասխանատվությունը վերապահված է Ռուսաստանին: Այսպես կոչված եվրաատլանտյան դաշնակցության աշխարհաքաղաքական փոփոխությունների ծրագրավորումն ու իրականացումը ապահովող բրիտանա-ամերիկյան բարձրագույն օղակը, դատելով ամեն ինչից, ունի ծանրակշիռ պատճառներ ու հիմնավորումներ նմանօրինակ որոշման համար: Վրաստանը և Մոլդովան այն կետերն են, որոնց նկատմամբ ունեցած վերահսկողությունը թույլ կտա պետք եղած ժամանակ շատ ցավոտ ազդակներ հղել Ռուսաստանին այն դեպքում, եթե վերջինս փորձ անի խախտել իր պատասխանատվության համար սահմանված շրջանակները: Ուկրաինան, Բելառուսը, Ադրբեջանն ու Հայաստանը պետք է մնան Ռուսաստանի գլխացավանքը, սակայն գործն այնպես է կազմապերպված, որ նրանք, իբր, իրենց կամքով են ընդունելու մեծ եղբոր գթառատ թևի տակ վերադառնալու մասին որոշումը, հակառակ նրան, որ Եվրոպան արտաքուստ ամեն ինչ արեց այդօրինակ «սխալ» քայլից նրանց ետ պահելու համար:
Մի իրավիճակ է ստեղծվել, երբ նախկինում իրենց «եվրոպատենչ» հռչակած պետությունները ստիպված են գլխիկոր՝ կրկին դեմքով շուռ գալ դեպի Ռուսաստանը, սակայն արդեն ոչ թե իրավահավասար գործընկերոջ, այլ ստորացված խնդրողի կեցվածքով: Շատ ձեռնտու շրջադարձ է թե´ Եվրոպայի, թե´ Ռուսաստանի համար: Ուկրաինայի ծախսը քաշելու ցանկություն Արևմուտքում չի եղել ու չի լինի. անիմաստ բան է: Դրա փոխարեն կարելի է էժան տարբերակով ապահովել սեփական կարևոր շահերն անհամեմատ պակաս ծախսատար Վրաստանի ու Մոլդովայի միջոցով, թեև, գուցե որոշ ժամանակ անց պարզվի, որ անգամ դրանց կարիքը չկա…»
