Ռուսաստանում առաջարկել են 25 տարով արգելել դատվածություն ունեցող ներգաղթյալների մուտքը երկիր
Ռուսական РИА Новости լրատվական գործակալության փոխանցմամբ՝ ռուս պատգամավոր Միխայիլ Սերդյուկը Պետդումայի դիտարկմանն է ներկայացրել դատվածություն ունեցող ներգաղթյալների համար Ռուսաստան մուտք գործելը 25 տարով արգելելու մասին օրինագիծը:
Առաջարկվում է տվյալ արգելքը տարածել այն օտարազգիների վրա, որոնք քրեական պատասխանատվության են ենթարկվել ցանկացած այլ երկրի տարածքում: Ներկա դրությամբ մուտքի արգելք է սահմանված Ռուսաստանի տարածքում հանցանքներ կատարելու դեպքում:
Դրանով իսկ օրինագիծն առաջարկում է խստացնել Ռուսաստանի միգրացիոն քաղաքականությունը՝ սահմանափակելով օտար երկրների քաղաքացիների մուտքը երկիրը:
