2011 թվականի մայիսի 26-ի ցույցի ցրման պլանը պատկանում է Գարիբաշվիլիի խորհրդականին
Грузия Online-ի փոխանցմամբ՝ Վրաստանի ներքին գործերի նախկին նախարար և նախկին վարչապետ Վանո Մերաբիշվիլիի փաստաբանը պնդում է, որ գոյություն է ունեցել 2011 թվականի մայիսի 26-ին ընդդիմության ակցիան ցրելու երկու պլան, որոնցից Մերաբիշվիլին ընտրել է առավել մարդասիրականը:
Փաստաբանի խոսքերով՝ ցույցը ցրելու այդ պլանները Մերաբիշվիլիին ներկայացրել են նրա տեղակալներ Շալվա Ջանաշվիլին և Գիյա Լորտկիպանիձեն, և որ Մերաբիշվիլին ընտրել է առաջին պլանը, քանի որ դա առավել մարդասիրական է եղել: Նա հավելել է, որ գործողությունը պլանավորվել է ճիշտ ձևով, սակայն հանգամանքները դասավորվել են այլ կերպ և գրանցվել են տուժածներ:
Ընդգծվում է, որ Մերաբիշվիլիի նախկին տեղակալ Շալվա Ջանաշվիլին ներկայումս նույնպես աշխատում է ՆԳՆ-ում, և զբաղեցնում է ներքին գործերի նախարար Իրակլի Գարիբաշվիլիի խորհրդականի պաշտոնը: Արդեն հայտնի է, որ Իրակլի Գարիբաշվիլին Վրաստանի հաջորդ վարչապետն է:
