«Հիմա ստացվում է, որ ձեր աշակերտները գնացել են Սյունի՞ք». Նիկոլ Փաշինյանը՝ Արագածոտնի մարզպետին

Արագածոտնի մարզպետ Սարգիս Սահակյանը ԱԺ-ին ներկայացրեց 2014թ-ի բյուջեով մարզին հատկացրած գումարները և նշեց, թե ծրագրերից ոչ մեկում նվազում չի կատարվել։ ԱԺ ՀԱԿ խմբակցության պատգամավոր Նիկոլ Փաշինյանն էլ այս առնչությամբ հարցրեց, թե ինչպե՞ս է ստացվում, որ ծրագրերից ոչ մեկի գծով նվազում չի կատարվել, բայց դպրոցներում երեխաների թիվը կրճատվել է: Համեմատելով 2014թ.-ի բյուջեի ոչ ֆինասական ցուցանիշների տվյալները, ՀԱԿ պատգամավորն ասաց, թե պարզել է, որ 2012-2013թթ.-ի աշակերտների թվաքանակը Արագածոտնի մարզում 770-ով պակասել է, այն դեպքում, երբ դպրոցների ֆիանասավորումը աշակերտների թվով է իրականացվում։ Նա նաև ասաց, թե բարձրացել է գործազրկության ցուցանիշը մարզում։ «Խնդիրն այն է, որ ոչ միայն աշակերտների թիվն է կրճատվել, այլ նաև աշխատողների, որը նույն բյուջեի տվյալներով՝ 62 հազարից դարձել է 51 հազար։ Աշակերտները նվազում են, աշխատողների թիվը նվազում է, բայց նվազում է նաև գործազկությունը»,- շարունակեց Ն. Փաշինյանը: Ի պատասխան` Արագածոտնի մարզպետն ասաց, թե նշված թվերը չեն համապատասխանում իրականությանը։ Ըստ նրա, 2012թ.-ի համեմատ 2013թ.-ին աշակերտների թիվը կրճատվել է 420 -ով։ Ինչ վերաբերվում է գործազրկությանը, ապա մարզպետն ասաց, որ թեև կոկրետ թվեր հրապարակել չի կարող, բայց հավաստիացրեց, որ մարզում գործազրկության ցուցանիշը նվազել է: Սարգիս Սահակյանը նաև հավելեց, որ մարզի աշխատողների թիվը պակասում է, որովհետև մարդիկ սեզոնային աշխատանքի են մեկնում, աշակերտների թիվն էլ պայմանավորվում է նրանով, որ մի մասը ավագ դպրոցներ են գնում, մի մասն էլ այլ դպրոցներ։ Նիկոլ Փաշինյանը շեշտեց, թե ամբողջ խնդիրը նրանում է, որ բոլոր մարզերում է աշակերտների թիվը պակասել։ Իր տեղից Սյունիքի մազպետը հակադարձեց. «Ո՞վ է ասում, մեր մարզում աշակերների թիվը ավելացել է»: Փաշինյանն էլ նայելով ձեռքի տակ եղած բյուջեի պաշտոնական տվյալներին, ապա Արագածոտնի մարզպետին ուղղելով իր խոսքը՝ ասաց. «Հիմա ստացվում է, որ ձեր աշակերտները գնացե՞լ են Սյունիք»։