Քաղաքացին երեխաների հետ հայտնվել է փողոցում. «Ավելի շուտ վերջ կտամ կյանքիս, քան ինձ թույլ կտամ կյանքս շարունակել փողոցում»
Մանկավարժ Գայանե Սահակյանի անունից 168.am-ը նամակ է ստացել, որում վերջինս տեղեկացնում է, որ իր տղաների հետ այսօր նա հայտնվել է փողոցում: Նամակում մասնավորապես ասված է.
«Սիրելի լրատվամիջոցներ, ես այսօր իմ 17 և 18 տարեկան տղաների հետ հայտնվել եմ փողոցում, խնդրում եմ օգնեք ինձ, բարձրաձայնեք իմ խնդիրը, անհուսահատ վիճակում եմ գտնվում:
1994 թվականից ամուսնուս և նրա մոր հետ ապրել եմ Արմավիր քաղաքի Ջիվանու 5-րդ շենքի 3-րդ բնակարանում, ունեցել եմ մշտական բնակության իրավունք, սույն թվականի օգոստոսին վտարվել եմ սեփական տնիցս և հայտնվել փողոցում:
1998-ին իմանալով, որ արտագնա աշխատանքի մեկնած ամուսինս Ռուսաստանում բանտարկված է , հասկացա, որ հետագայում բնակարանի նկատմամբ հնարավոր ոտնձգություններից խուսափելու միակ ճանապարհն այդ հասցեում գրանցվելն ու մշտական բնակության իրավունք ձեռք բերելն է , անմիջապես դիմեցի Արմավիրի մարզի ընդհանուր իրավասության դատարան և դատարանի վճռով ստացա ամուսնուս ծնողների տանը մշտական բնակվելու իրավունքը:
Սկեսուրիս մահից հետո՝ 2004 թվականին իմանում եմ, որ մեր 4 սենյականոց բնակարանը, որը նույն շքամուտքի երկու բնակարանների միակցումից էր մեծացել, սկեսուրս կտակել է իր աղջկան՝ Նարինե Սահակյանին:
Ամուսնուս քույրը՝ Նարինե Սահակյանը հակընդեմ հայցով դիմում է դատարան՝ ինձ ու իմ երկու տղաներին Ջիվանու 5 հասցեից վտարելու պահանջով: Դատարանը բավարարում է նրա պահանջը: Այս խնդրով դիմել եմ Արմավիրի մարզի դատախազություն: Փաստի առիթով քրեական գործ է հարուցվում ՀՀ քրօր. 325 հոդվածի 1-ին մասի հատկանիշներով:
Այսօր հարկադրաբար անտուն դարձած ընտանիքի ճակատագրով մտահոգվողներ չկան:
Իսկ եթե անզոր գտնվեմ ջրի երես հանելու կեղծիքը, ավելի շուտ վերջ կտամ կյանքիս, քան ինձ թույլ կտամ կյանքս շարունակել փողոցում»:
Գայանե Սահակյան
Մանկավարժ
