Խոշոր հրդեհ Գյումրիում (լուսանկարներ)
ԳԱԼԱ-ի փոխանցմամբ` խոշոր հրդեհ է բռնկվել Գյումրիում: Այս պահին այրվում է Գյումրու Կարեն Դեմիրճյան փողոցում տեղակայված տնային կառավարչության շենքը, որը համակարգում էր քաղաքի բոլոր համատիրությունների աշխատանքը: Հրդեհը գրանցվել է ժամը 15-ի սահմաններում՝ աշխատանքային ժամին: Սակայն տնային կառավարչության աշխատակիցները կայք-ի լրագրողին պատմել են, որ իրենք տեղյակ չեն եղել եւ չեն էլ հասկացել, անգամ պատկերացնում չունեն` ինչպես կամ ինչից կարող էր հրդեհ առաջանալ: Հրդեհը սկսվել է տնակներում եւ պահեստներում, որտեղ գտնվում են նաեւ Գյումրու համատիրություններին պատկանող սարքավորումները եւ գույքը:
Հրդեհը հանգցնելու համար միանգամից մի քանի հրշեջ-փրկարար ջոկատներ են ժամանել դեպքի վայր, սակայն հրդեհը հանգցնել չի հաջողվում, որովհետեւ կրակը բավականին արագ է տարածվում: Ինչպես տեղեկացնում է կայքի թղթակիցը, այս պահին հրդեհը տարածվել եւ ընդգրկել է նաեւ հարեւան սեփական տների կտուրները:
Հրշեջ-փրկարարների հետ հրդեհաշիջման աշխատանքներին մասնակցում են նաեւ հարակից տների բնակիչները: Իսկ տնային կառավարչության աշխատակիցները զարմացած եւ շվարած են, նրանք անգամ պատկերացում չունեն, թե ինչպես կարող էր հրդեհ բռնկվել պահեստներում: Տեղում է նաեւ տնային կառավարչության պետը՝ Մովսես Ջուհարյանը, ով Գյումրու նախկին քաղաքապետ Վարդան Ղուկասյանի մտերիմների շրջանակից է:
