Նորբերթ Լամմերթ. Գերմանիան հարգանքով է վերաբերվում ՀՀ-ի՝ Մաքսային միությանը միանալու որոշմանը

Հոկտեմբերի 6-ին Ժնևում, Միջխորհրդարանական միության վեհաժողովի շրջանակներում, Ազգային ժողովի նախագահ Հովիկ Աբրահամյանը հանդիպեց Գերմանիայի Բունդեսթագի նախագահ Նորբերթ Լամմերթի հետ:

Հանդիպման ընթացքում կողմերն անդրադարձան Հայաստան-Գերմանիա հարաբերություններին, կարեւորեցին միջխորհրդարանական կապերի հետագա խորացումը, քննարկեցին տարածաշրջանային վերջին զարգացումներին վերաբերող եւ երկկողմ հետաքրքրություն ներկայացնող մի շարք հարցեր:

Հովիկ Աբրահամյանը շնորհավորեց Նորբերթ Լամմերթին սեպտեմբերի 22-ին կայացած հերթական խորհրդարանական ընտրություններում Անգելա Մերկելի ղեկավարած Քրիստոնյա-դեմոկրատական միության տարած հաղթանակի կապակցությամբ: Նա բարձր գնահատեց հայ-գերմանական հարաբերությունների ներկա մակարդակը` նշելով, որ Հայաստանը մեծապես հետաքրքրված է ընդլայնել հարաբերությունները Գերմանիայի հետ ինչպես երկկողմ, այնպես էլ բազմակողմ ձեւաչափերով:

ԱԺ նախագահը նշեց, որ Հայաստանը շարունակելու է հանձնառու մնալ եվրոպական արժեքներին ու սկզբունքներին, եւ մենք վճռական ենք եվրոպացի գործընկերների հետ միասին ընդլայնելու եւ խորացնելու ինստիտուցիոնալ բարեփոխումների գործընթացը՝ ուղղված ժողովրդավարության, մարդու իրավունքների եւ օրենքի գերակայության շարունակական ամրապնդմանը:    Անդրադառնալով վերջին զարգացումներին` Հովիկ Աբրահամյանը նշեց, որ Հայաստանը առաջնորդվում է շահերի համադրման սկզբունքով եւ շարունակում է խորացնել ու ընդլայնել հարաբերությունները թե եվրոպական գործընկերների, եւ թե ռազմավարական դաշնակից Ռուսաստանի Դաշնության հետ: Նրա խոսքով` Եվրոպական միությունը եղել եւ շարունակում է մնալ Հայաստանի կարեւորագույն գործընկերներից: Հովիկ Աբրահամյանը նշեց, որ մեր երկիրը միշտ բաց է եղել համագործակցության համար բոլոր միջազգային հարթակներում, հանդես եկել ի օգուտ ինտեգրացիոն գործընթացների, բայց երբեք չի անտեսել երկրի ռազմավարական շահերը, հատկապես փակ սահմանների ու հակամարտության առկայության պայմաններում:

Կարեւորելով Բունդեսթագի կողմից հովանավորվող «Միջազգային խորհրդարանական կրթաթոշակ» ծրագիրը, որը Հայաստանի երիտասարդ սերնդի համար Գերմանիայի քաղաքական եւ տնտեսական համակարգին ծանոթանալու լավ հնարավորություն է ընձեռում` Հովիկ Աբրահամյանը նշեց, որ Ազգային ժողովը նույնպես պատրաստակամ է 2014 թվականից երկու ուսանող ընդունել հնարավորություն ընձեռելով գերմանացի ուսանողներին ծանոթանալու Հայաստանի քաղաքական եւ տնտեսական համակարգին:

Գերմանիայի Բունդեսթագի նախագահը շնորհակալություն հայտնեց շնորհավորանքների համար եւ ներկայացրեց խորհրդարանական ընտրություններից հետո Գերմանիայում ներքաղաքական իրավիճակը, Բունդեսթագում քաղաքական ուժերի հարաբերակցությունը:

Նորբերթ Լամմերթը կարեւորեց Հայաստան-Գերմանիա հարաբերությունների հետագա զարգացումը, միջխորհրդարանական գործակցության խորացումը, համագործակցության ամրապնդումը մի շարք ոլորտներում:

Բունդեսթագի նախագահը շեշտեց, որ Գերմանիան շահագրգիռ է զարգացնել Հայաստանի հետ հարաբերությունները տարբեր ուղղություններով` նշելով, որ վերջին զարգացումները չեն նվազեցրել հետաքրքրությունը մեր երկրի նկատմամբ, եւ Գերմանիան հարգանքով է վերաբերվում Հայաստանի՝ Մաքսային միությանը միանալու որոշմանը: Նա նույնպես կարեւորեց ԵՄ-Հայաստան հարաբերությունների հետագա խորացումը եւ նշեց, որ որքան կայուն ընթանան ժողովրդավարական գործընթացները Հայաստանում, այնքան ավելի դինամիկ կզարգանան Հայաստան-ԵՄ հարաբերությունները:

Հանդիպման վերջում Բունդեսթագի նախագահը Հովիկ Աբրահամյանին պաշտոնական այցով հրավիրեց Գերմանիա:

ՀՀ ԱԺ հասարակայնության և տեղեկատվության միջոցների հետ կապերի վարչություն