Ըստ Մեծ Բրիտանիայի դեսպանի՝ Ամուլսարի նախագիծը Հայաստանին մեծ օգուտներ կբերի
Հայաստանում Միացյալ Թագավորության դեսպան Ջոնաթան Էյվսը այսօր լրագրողների հետ հանդիպման ժամանակ խոսել է Հայաստանի տնտեսությունում ՄԹ կողմից կատարված ներդրումների մասին։ Նա նշել է HSBC բանկը և մի քանի դեղագործական ընկերություններ, սակայն ավելացրել է, որ ներդրումների քանակի և ծավալի առումով ներկայիս իրավիճակը գոհացուցիչ չէ։
«Մենք ցանկանում ենք խթանել, որպեսզի ավելի մեծ թվով բրիտանական ընկերություններ ներդրումներ իրականացնեն Հայաստանում: Lydian International ընկերությունը գլխավորում է այն ընկերությունների ցանկը, որոնց հետ մենք աշխատում ենք և որոնց խրախուսում ենք ներդրումներ կատարել այստեղ: Ինչպես հայտնի է, Lydian International-ը պատրաստվում է ոսկու արդյունահանման լայնամասշտաբ նախագիծ իրականացնել Ամուլսարում։ Կարծում ենք, որ այդ նախագիծը մեծ օգուտներ կապահովի Հայաստանի համար»,- ասել է դիվանագետը։
Նա ընդգծել է, որ Ամուլսարի նախագիծը ոչ միայն նոր աշխատատեղեր կստեղծի և լրացուցիչ հարկային եկամուտներ կապահովի Հայաստանի համար, այլև արևմտյան այլ ընկերություններին ցույց կտա, որ Հայաստանը մի տեղ է, որտեղ միջազգային չափանիշներով գործող ընկերությունները կարող են հաջողությամբ աշխատել։
