Ասիա- Խաղաղօվկիանոսյան տարածաշրջանում միլիոնատերերի թիվը հասնում է 3,68 միլիոնի
Ասիա-Խաղաղօվկիանոսյան տարածաշրջանում անցած տարի 300 հազար նոր միլիոնատերեր են ավելացել. այսպիսով 3,68 մլն մարդ տարածաշրջանում միլիոնատեր է: Այդ մասին չորեքշաբթի հայտարարել են «Capgemini» միջազգային քոնսալթինգային ընկերության եւ «Royal Bank of Canada» բանկի փորձագետները` ներկայացնելով իրենց համատեղ զեկույցը տարածաշրջանի վերաբերյալ:
Ըստ զեկույցի` միլիոնատերերի կարողությունը միասին վերցված կազմում է 12 տրիլիոն դոլար` 12,2%-ով ավելի, քան անցած տարի:
Զեկույցի հեղինակները հաշվի են առել միայն այն ունեւորներին, որոնք ունեն մեկ մլն դոլարից ոչ պակաս արժեթղթեր: Հաշվարկների մեջ չեն մտել անշարժ գույքը, մեքենաները, զբոսանավերը, պերճանքի առարկաները:
«Royal Bank of Canada»-ի վերլուծաբան Ջորջ Լյուիսն ասել է, որ վերջին հինգ տարում այս տարածաշրջանում միլիոնատերերի թիվն աճում է երկու անգամ ավելի արագ, քան ողջ աշխարհում, իսկ նրանց ընդհանուր կարողությունը` երեք անգամ:
Նշվում է, որ անցած տարվա տվյալներով աշխարհում միլիոնատերերի ընդհանուր թիվը հասնում էր 12 միլիոնի, որոնց ընդհանուր կարողությունը գնահատվում է 46,2 տրիլիոն դոլար: Մասնավորապես` Եվրոպայում բնակվում է 3,41մլն, ԱՄՆ-ում եւ Կանադայում` 3,73 մլն,
Լատինական Ամերիկայում` 520 հազար, Մերձավոր Արեւելքում`490 հազար, Աֆրիկայում` 140 հազար միլիոնատեր:
