Երկրաշարժից հետո Արաբական ծովում կղզի է գոյացել
Պակիստանյան Geo News հեռուստաալիքի փոխանցմամբ՝ Արաբական ծովում՝ Պակիստանի ափերի մոտ, առաջացել է փոքր կղզի: Դա տեղի է ունեցել Պակիստանի հարավ-արևմտյան հատվածում ընկած Բելուջիստան նահանգում գրանցված 7.7 մագնիտուդ ուժգնությամբ երկրաշարժի արդյունքում:
Բելուջիստանի իշխանությունները հայտնել են, որ կղզին ծովից վեր է խոյացել 6-12 մետր, նրա լայնությունը կազմում է մոտ 30 մետր: Կղզին գտնվում է պակիստանյան Գվադար նավահանգստից մոտ 90 մետր հեռավորության վրա:
Վերջին տվյալներով՝ Բելուջիստանում գրանցված այդ երկրաշարժի հետևանքով զոհվել է ավելի քան 200 մարդ: Ավարան շրջանում ավերվել է տների առնվազն 30 տոկոսը:
