Ջեյմս Ուորլիքը «երջանիկ է», որ գտնվել է Ղարաբաղում
ԵԱՀԿ-ի Մինսկի խմբի ԱՄՆ նորանշանակ համանախագահը ուրբաթ օրը Ստեփանակերտում հայտարարեց, թե երջանիկ է գտնվելու Լեռնային Ղարաբաղում:
«Ես իրոք երջանիկ եմ, որ կարողացա այցելել ձեր գեղեցիկ երկիրը», – «Ազատություն» ռադիոկայանի փոխանցմամբ` Լեռնային Ղարաբաղի իշխանությունների հետ շուրջ երկու ժամ տևած հանդիպումից հետո հայտարարեց Ջեյմս Ուորլիքը, ով, իր խոսքերով, Լեռնային Ղարաբաղում է՝ լսելու, սովորելու, ծանոթանալու բոլոր կողմերի կարծիքներին:
«Բոլոր հանդիպումների ժամանակ ուզում եմ մի քայլ առաջ նայել և տեսնել, թե ինչ հնարավորություններ կան ավելի կայուն խաղաղության հասնելու համար», – ասել է ամերիկացի համանախագահը:
Նախկինում Միացյալ Նահանգների Պետդեպարտամենտի եվրոպական անվտանգության և քաղաքական հարցերով բյուրոյի տնօրենի ու Բուլղարիայում ԱՄՆ-ի դեսպանի պաշտոնները զբաղեցրած Ջեյմս Ուորլիքը այս օգոստոսի սկզբին նշանակվեց ԵԱՀԿ-ի Մինսկի խմբում համանախագահ, և սա նոր կարգավիճակով ամերիկացի դիվանագետի առաջին այցն է տարածաշրջան:
Ամերիկացի համանախագահը, ով Ստեփանակերտ է ժամանակել երեկ երեկոյան, Twitter-ի իր էջում այդ մասին շտապել է հաղորդագրություն թողնել, որտեղ ասվում է․ «Ղարաբաղ. հանդիպում բարձրաստիճան պաշտոնյաների հետ և շփման գծի դիտարկում»: Մասնավորապես «բարձրաստիճան պաշտոնյաներ» ձևակերպումը անմիջապես հարուցել է Ադրբեջանի արտգործնախարարի խոսնակի և այլ օգտատերերին զայրույթը, ինչին ամերիկացի դիվանագետը չի արձագանքել:
Ջեյմս Ուորլիքը Ստեփանակերտում հայտարարեց կողմերի միջև խաղաղության հասնելու, փոխադարձ վստահություն հաստատելու հնարավորությունների մասին:
«Մեր հիմնական առաքելությունն է կողմերի միջև շփման խողովակների բացելը: Եթե իրոք մենք կարողանանք հասնել վերջնական խաղաղության, բնական է, որ պիտի զարգացնենք փոխադարձ վստահությունը բոլոր այն մարդկանց միջև, ովքեր ապրում են այստեղ», – հայտարարեց ամերիկացի միջնորդը, ով լրագրողների հետ հանդիպումից հետո շտապեց մասնակցել շփման գծի դիտարկմանը:
