Էդվարդ Նալբանդյան. Շարունակելու ենք բոլոր ձևերով ընդլայնել այնքանով, որքանով, որ հնարավոր կհամարի Եվրամիությունը
Հայաստանը շարունակելու է իր ամենասերտ համագործակցությունը Եվրոպական միության հետ: Այս մասին ԱԺ-ում Կառավարության հետ հարցուպատասխանի ժամանակ հայտարարեց ՀՀ արտաքին գործերի նախարար Էդվարդ Նալբանդյանը` պատասխանելով ԱԺ ԲՀԿ խմբակցության պատգամավոր Տիգրան Ուրիխանյանի այն հարցին, թե Վիլնյուսում Ասոցացման համաձայնագրի փաստաթուղթը նախատեսվո՞ւմ է ստորագրել, թե՞ ոչ:
«Հայաստանը շարունակելու է բոլոր ձևաչափերով իր հարաբերությունները զարգացնել, խորացնել և ընդլայնել այնքանով, որքանով, որ հնարավոր կհամարի Եվրամիությունը, և դա չի խանգարի Մաքսային միությանը միանալու մեր որոշմանը»,- ավելացրեց Է. Նալբանդյանը՝ ըստ էության, չպատասխանելով Տ. Ուրիխանյանի հարցին:
ԲՀԿ պատգամավորին չգոհացրեց նախարարի պատասխանը. «Այդ խրատահորդորային զրույցի համար շնորհակալ եմ: Բայց ես ասացի,որ երանգավորումներ իմ հարցը չունի՝ ինչ պետք է իմանայի, ինչ պետք է չիմանայի… Կա՞ն երաշխիքներ, որ մենք կգնանք Վիլնյուս, կնախաստորագրենք, իսկ դուք ասում եք Հայաստանի ցանկությունը… թե Հայաստանն ասել է, որ շարունակելու է: Եվոպացիներն արդյո՞ք նույնն են ասում»:
Ի պատասխան Էդվարդ Նալբանդյանը հիշեցրեց, որ Հայաստանը շարունակելու է համագործակցությունը՝ հիմնվելով այն հաջողությունների, ձեռքբերումների վրա, որոնք կան Հայաստանի և ԵՄ միջև. «Եթե որևէ մեկը ուրիշ երանգ է դնում սրա մեջ, դա անձնական մոտեցում է: Հստակ է ասված»:
Ինչ վերաբերում է ապագա համագործակցությանը, նախարարը ավելացրեց նաև, թե հանձնակատար Շտեֆան Ֆյուլեի հետ իր հանդիպումից հետո տարածված հաղորդագրության մեջ ասվում է, որ շարունակվելու են ինտենսիվ բանակցությունների ԵՄ և ՀՀ միջև:
