ԱՄՆ-ը սկսել է զենք մատակարարել Սիրիայի ապստամբներին
Ռուսական ИТАР-ТАСС լրատվական գործակալության փոխանցմամբ՝ ԱՄՆ-ը սկսել է մի շարք զինատեսակների մատակարումը սիրիական ընդդիմությանը: Այս մասին երեկ Վաշինգտոնում տեղի ունեցած մամուլի ասուլիսի ժամանակ հայտարարել է Սիրիայի հեղափոխական ու ընդդիմադիր ուժերի Ազգային դաշինքի ներկայացուցիչ Խալիդ Սալեհը:
Վերջինս ընդգծել է, որ ԱՄՆ է ժամանել ընդդիմության պատվիրակության կազմում՝ Սպիտակ տանը և Կոնգրեսում հանդիպումներ անցկացնելու համար, և բացի այդ, ամերիկացի օրենսդիրներին կոչ է անելու հավանության արժանացնել Սիրիայի դեմ ռազմական գործողությունը սկսելն արտոնող բանաձևը:
Սալեհը հավելել է, որ Սիրիական ազատ բանակին հաջողվել է ԱՄՆ-ին համոզել, որ նրա տրամադրած զենքը չի հայտնվի «վատ ձեռքերում» (նկատի են առնվում ահաբեկչական խմբավորումները և մասնավորապես «Ալ-Քաիդայի» հետ կապված «Ջաբհաթ ալ-Նուսրա» խմբավորումը):
Հիշեցնենք, որ ԱՄՆ նախագահ Բարաք Օբաման կոնգրեսականներին կոչ է արել հետաձգել վերոնշյալ բանաձևի շուրջ քվեարկությունը և ևս մեկ հնարավորություն տալ Սիրիայի իշխանություններին: Դրա հետ մեկտեղ նա ընդգծել է, որ ԱՄՆ-ը վստահ է, որ Դամասկոսի մոտ քիմիական զենքի կիրառման հետևում կանգնած է Բաշար Ասադի վարչակարգը:
