Իրաքում գիշերային հարձակումների հետևանքով զոհվել է մոտ 30 մարդ
Ռուսական ИТАР-ТАСС լրատվական գործակալության փոխանցմամբ՝ այս գիշեր սուննի ծայրահեղականները մի շարք ահաբեկչություններ են իրականացրել Իրաքի տարածքում: Դրանց հետևանքով զոհվել է մոտ 30 մարդ:
Բաղդադից 160 կիլոմետր հյուսիս ընկած Սուլեյման-Պեկ քաղաքում զինյալները կանգնեցրել են նավթի ցիստեռների շարասյունը և գնդակահարել են 14 վարորդի: Բոլոր սպանվածները շիաներ են:
Չորս զինծառայող էլ զոհվել է իսլամիստների կողմից Բաղդադից Մոսուլ մեկնած զինվորականների փոխադրամիջոցի վրա իրականացրած հարձակման հետևանքով: Մոսուլից հարավ ընկած Շուրա վայրում սուննի զինյալներն ամբողջովին ոչնչացրել են ոստիկանական պահակակետը՝ սպանելով ՆԳՆ 9 աշխատակցի:
Այս շաբաթ «Ալ-Քաիդայի» զինյալները գրոհել էին բանտերի վրա և ազատ արձակել մոտ 500 իրենց համակիրների, որոնք արդեն իսկ ակտիվորեն ներգրավվել են ծայրահեղական գործունեության մեջ:
