Սարգիս Գևորգյան. Մեզ այդպես էլ ոչ ոք չասաց, թե ինչո՞ւ են մեզ տարել, ի՞նչ հիմնավորմամբ և ինչո՞ւ են ազատել
Քիչ առաջ Ոստիկանության Կենտրոնի բաժնից ազատ են արձակվել «Չենք վճարելու 150 դրամ» ակցիայի մասնակիցներ Արեգ և Սարգիս Գևորգյանները, Դավիթ Հարությունյանը, Գևորգ Սաֆարյանը, Գուրգեն Ասատրյանը և Վիլեն Գաբրիելյանը (Նավակ ճոճող):
168.am-ի հետ զրույցում ՀԱԿ ակտիվիստ Սարգիս Գևորգյանն ասաց, որ իրենք ոստիկանությունում այդպես էլ որևէ բացատրություն չեն տվել:
Հիշեցնենք, որ ավելի վաղ մեզ հետ զրույցում ՀԱԿ ակտիվստն ասել էր, թե տեղյակ չէ՝ ինչո՞ւ են իրենց բերման ենթարկել, և ոստիկանությունում էլ չեն կարողացել պարզաբանել իրենց բաժին տեղափոխելու պատճառը:
«Մեզ ոչինչ չեն ասել գրել, ոչ մի գործողություն մենք չենք արել ոստիկանությունում: Այս ամբողջ ընթացքում նստած էինք ուղղակի: Մեզ այդպես էլ ոչ ոք չասաց, թե ինչո՞ւ են մեզ տարել, ի՞նչ հիմնավորմամբ և ինչո՞ւ են ազատել»,- նշեց նա:
Սարգիս Գևորգյանն ասաց, որ ոստիկանության բաժնում այս պահին 1 ակտիվիստ կա, ում հավանաբար տեխնիկական պատճառներով դեռևս չեն ազատել:
