Շարմազանովը երեկվանից էլի «ՀՀ նախագահ» է. մամուլ
«Հրապարակ» օրաթերթը գրում է. «Շարմազանովը երեկվանից էլի «ՀՀ նախագահ» է. Սերժ Սարգսյանը «մեկնել է կարճատև արձակուրդ», Հովիկ Աբրահամյանը՝ նույնպես: Երեկ բազմազբաղ «նախագահն» օրվա վերջում պատասխանեց մեր հարցին` որ երկիր է մեկնել Սերժ Սարգսյանը, որտեղ է անցկացնելու հանգիստը: Շարմազանովը գործնական տոնով և խիստ սպառիչ ասաց` «արտերկրում»:
Մեր տեղեկություններով, Սերժ Սարգսյանը մեկնել է Գերմանիա, ուր առողջական «լուրջ» կուրս անցնելուց հետո կհանգստանա: Հովիկ Աբրահամյանը, մեր տեղեկություններով, ուղեկցում է նրան, իսկ մի քանի օր անց նրանց կմիանան ևս մի քանի հայաստանյան բարձրաստիճան պաշտոնյաներ` համատեղ հանգստանալու համար: Բադեն-Բադենը հաստատ այս անգամ էլ չի շրջանցվելու»:
