Հարսանիք անգլիական ձևով.վեճն ուտելիքի համար վերածվել է զանգվածային կռվի
Բրիտանական Նորֆոլք կոմսության Ֆրիթոն ավանում հարսանեկան տոնախմբությունը վերածվել է իսկական զանգվածային ծեծ ու ջարդի այն բանից հետո, երբ հարսանեկան շվեդական սեղանի մոտ հերթ կանգնած երկու հյուրերի միջև ծագել է վիճաբանություն: Այս մասին գրում է «Փաստինֆոն»:
Փեսան հայտնել է, որ կռիվը սկսվել է, երբ հանդիսությունը մոտենում էր ավարտին: Ըստ նրա իր 30-ամյա եղբայրը՝ Դենին որդուն հյուրասիրելու նպատակաով, փորձել է հերթը շրջանցել և սեղանից վերցնել մի կտոր հավի միս: Սակայն, հերթը շրջանցող Դենիի հանդգնությունը դուր չի եկել հարսի 53-ամյա հորեղբորը՝ Կուրտ Հյուզին: Նա բարձր բղավել է և փեսայի եղբորը հրել մի կողմ: Երկու տղամարդկանց միջև վեճ է առաջացել, որի ընթացքում հարսնացուի հորեղբայրը բոլորին հասկացրել է, որ այս հարսանիքը հաջող ձեռնարկ չի, որ ուտելիքը բանի նման չէ և, ընդհանրապես, իմաստ չուներ այստեղ գալը: Վեճին են միացել նաև հանդիսության մյուս մասնակիցները, այդ թվում հարսնացուի հորեղբոր կինը՝ Էլեյնը և հարսնաքույրը՝ Քրիստել Քոլմանը:
Կուրտ Հյուզը, ի վերջո, չի կարողացել իրեն զսպել: Նա հարձակվել է ու սկսել հարվածել բոլոր նրանց, ում կարողացել է: Նրա հարվածներից բաժին է հասել նույնիսկ հարսի մորը, հորը և քրոջը: Ի դեպ, վերջին պարագայում հարվածի հետևանքով հարսնացուի քրոջ քիթն, ուղղակի, ջարդվել է և նա հայտնվել է հիվանդանոցում:
Հյուրանոցի ռեստորանից, որտեղ տեղի էր ունենում հարսանիքը, աղմկարար հյուրերը դուրս են եկել և իրենց ձեռնամարտը շարունակել փողոցում: «Սարասափելի է, որ իմ քրոջ համար այս առանձնահատուկ օրը վերածվեց մղձավանջի»,- ասել է Քրիստելը՝ մոռացած իր ջարդված քիթը: Բայց նա խոստովանել է, որ կռվից հետո ինքը կորցրել է գիտակցությունը և ուշքի է եկել միայն այն ժամանակ, երբ լսել է իր որդու սարսափահար ճիչը. «Մաման մահացավ»:
Եվ քանի որ կռվի ընթացքում հարվածներ էր ստացել նաև հարսնացուի 47-ամյա մայրը, իսկ Քրիստելին հիվանդանոց հասցնող չկար, ապա դա ստիպված արել է ինքը՝ հարսնացուն, որն ի դեպ, գտնվում է 8-ամսական հղիության վիճակում:
Հենց հարսնացուի կանչով էլ այս յուրահատուկ հարսանիքի վայր է ժամանել ոստիկանական 10 մեքենա: Օրենքի պահապանները ձերբակալել են Կուրտ Հյուզին՝ հարձակման կասկածանքով: Մի փոքր ավելի ուշ, այս տղամարդը գրավի դիմաց ազատ է արձակվել, սակայն հրաժարվել է որևէ մեկնաբանություն տալ:
