Այս պահին մի խումբ ակտիվիստներ բողոքի ակցիա են անցկացնում ՀՀ-ում ՌԴ դեսպանատան դիմաց
Հայաստանում մի խումբ ակտիվիստներ որոշել են իրենց դժգոհությունն արտահայտել հայազգի վարորդ Հրաչյա Հարությունյանի նկատմամբ Ռուսաստանի Դաշնության արդարադատության համակարգի ցուցաբերած անհարգալից վերաբերմունքի դեմ: Այս մասին գրում է «Փաստինֆոն»:
Այդ նպատակով նրանք այսօր ժամը 15:00-ին, ՀՀ-ում ՌԴ դեսպանատան դիմաց բողոքի ակցիայի նախաձեռնությամբ են հանդես եկել սոցիալական ցանցում:
Այդ նպատակով Ֆեյսբուքում հատուկ նախաձեռնություն է բացվել, որտեղ տեղադրված է հետևյալ հայտարարությունը. «Հավաքվում ենք Ռուսաստանի Դաշնության դեսպանատան առջև՝ ցույց տալու մեր դժգոհությունը Հրաչյա Հարությունյանին դատարանում ծաղրելու և ոչ մարդկային վերաբերմունքի դեմ»:
Նշենք, որ 14:30-ի դրությամբ՝ նախաձեռնությանը մասնակցելու պատրաստակամություն են հայտնել Ֆեյսբուքի 330 օգտատերեր:
Հիշեցնենք, Հայաստանի քաղաքացի Հրաչյա Հարությունյանը մեղադրվում է «երթեւեկության կանոնները խախտելու մեջ, ինչը հանգեցրել է երկու եւ ավելի մարդկանց մահվան»։ Հուլիսի 13-ին Պոդոլսկ քաղաքից ոչ հեռու գտնվող Օզնոբիխինո գյուղի մոտ Հարությունյանի վարած «Կամազը» չէր արգելակել և բախվել էր «Լիազ» մակնիշի ուղևորատար ավտոբուսին: Վթարի հետևանքով 18 մարդ զոհվել է:
