Երևանում հագուստեղենի խանութներից գողությունների թիվը կտրուկ աճել է. մամուլ
«Երեկ ահազանգ ստացանք, որ Երևանում հագուստեղենի վաճառքով զբաղվող խանութներից գողությունների թվի կտրուկ աճ է նկատվում: Այդ երևույթը հատկապես տարածված է բրենդային՝ համեմատաբար թանկ հագուստեղենի խանութներում»,- գրում է «Հայկական Ժամանակ» օրաթերթը և շարունակում.
«Գողությունների հարաճուն դինամիկան ստիպում է այդ խանութներին արտառոց հակաքայլեր ձեռնարկել: Բանը հասել է այնտեղ, որ առանձին դեպքերում հաճախորդները նույնիսկ հնարավորություն չեն ունենում հագուստը գնելուց առաջ փորձել այն:
Վաճառողների պնդմամբ, հատկապես կանայք հանդերձարաններում հագուստների վրայից մկրատով հեռացնում են անվտանգության մագնիսները և դուրս հանում դրանք խանութից:
Սա նոր երևույթ է Հայաստանում: Մինչև վերջերս հայաստանցիներն իրար սարսափահար պատմում էին Եվրոպայում խանութներից մեր հայրենակիցների գողությունների մասին: Այս երևույթը փաստորեն ներգաղթել է»:
