Հստակեցվել է բժշկասոցիալական փորձաքննության իրականացման կարգը
Հուլիսի 13-ից ուժի մեջ են մտնում «Բժշկասոցիալական փորձաքննության իրականացման կարգը հաստատելու մասին» կառավարության 2006 թ.-ի մարտի 2-ի որոշման հավելվածում կատարված լրացումներն ու փոփոխությունը:
Կառավարության հունիսի 20-ի որոշմամբ կատարված լրացումներով, կանոնակարգվում է հեռակա բժշկասոցիալական փորձաքննության իրականացման կարգն այն դեպքերում, երբ hաշմանդամը բուժման նպատակով գտնվում է Հայաստանի Հանրապետությունից դուրս:
Մասնավորապես, սահմանվում է, որ հեռակա փորձաքննությունն իրականացվում է, եթե հաշմանդամություն ունեցող անձն իր նախորդ բժշկասոցիալական փորձաքննությունն անցել է իր մշտական բնակության վայրում: Հեռակա փորձաքննության արդյունքում հաշմանդամությունն անժամկետ չի սահմանվում:.
Բացի այդ, կառավարությունը նաև կանոնակարգել է ՀՀ աշխատանքի և սոցիալական հարցերի նախարարի սահմանած` համալիր (ինտեգրված) սոցիալական ծառայությունների տարածքային կենտրոնի առկայության դեպքում բժշկասոցիալական փորձաքննական հանձնաժողով դիմելու կարգը:
Համաձայն մինչ այժմ գործող կարգի՝ փորձաքննական խորհրդատվության համար նախատեսված է 5 աշխատանքային օր, սակայն երբեմն փորձաքննվող անձինք սահմանված ժամկետում հնարավորություն չեն ունենում համապատասխան ստորաբաժանման կողմից ստանալ խորհրդատվություն, ինչի հետևանքով տարածքային մարմինը որոշում է կայացնում առանց խորհրդատվության:
Սուբյեկտիվ մոտեցումներից խուսափելու համար սահմանվել է, որ եթե նախատեսված ժամկետում փորձաքննվող անձը չի ստացել փորձաքննական խորհրդատվություն, ապա վարչական վարույթը կասեցվում է և փորձաքննական որոշումը կայացվում է համապատասխան ստորաբաժանման կողմից անձի խորհրդատվություն ստանալուց հետո:
