Ովքե՞ր թեկնածու կառաջադրեն թիվ 38 ընտրատարածքում. մամուլ
«Հրապարակ» օրաթերթը գրում է. «Այսօր, կառավարության նիստում, Վահե Հակոբյանը պաշտոնապես կնշանակվի Սյունիքի մարզպետ: Անկախ այն բանից, թե հայրիկի հովանու տակ կարիերա արած երիտասարդն ինչպիսի մարզպետ կլինի, պետք է արձանագրել, որ Սուրիկ Խաչատրյանի պաշտոնանկությամբ ստեղծված վախի մթնոլորտը մարզում նահանջել է:
Թեև այս կադրային փոփոխությունը, իհարկե, մարզում մի նոր լարվածություն է ստեղծելու: Թիվ 38 ընտրատարածքում, որտեղից Վահեն երեք անգամ «ընտրվել» է պատգամավոր, նոր ընտրություն պետք է նշանակվի, և բնական է, որ նոր մարզպետն ու իր հայրը փորձելու են իրենց ուզած մարդուն մտցնել խորհրդարան: Դա նշանակում է, որ ընդդիմադիրներին այստեղ թեժ պայքար է սպասվում պատգամավորի մանդատի համար: Իսկ ընդդիմադիրներից ո՞վ է պատրաստ պայքարելու:
Արմատական ընդդիմություն համարվող Հայ ազգային կոնգրես կուսակցությունը, որը 2012-ի մայիսին հուժկու պայքարի էր լծվել և այստեղ առաջադրել Դավիթ Մաթևոսյանի թեկնածությունը, դեռ հարցը չի քննարկել: Լևոն Զուրաբյանն անգամ դժվարացավ հայտնել՝ իրենք թեկնածու առաջադրելու են, թե ոչ:
«Ժառանգություն» կուսակցությունը, որը դեռևս ամիսներ առաջ՝ նախագահական ընտրություններում, Լիսկայի ստրկացրած մարզում հաղթանակ գրանցեց, չի բացառում, որ թեկնածու կառաջադրի: «Ժառանգության» փոխնախագահ Արմեն Մարտիրոսյանը մեզ հետ զրույցում ասաց. «Նախագահական ընտրություններում Կապանում իշխանությունների համար անսպասելի արդյունքներ գրանցվեցին, որ Րաֆֆի Հովհաննիսյանը պաշտոնապես հաղթեց, դա ևս վստահություն է ներշնչում «Ժառանգությանը», որ քննարկումներում նաև այդ ընտրատարածքի արդյունքները նկատի ունենա վերջնական որոշում կայացնելիս»:
Նշենք, որ նախորդ ընտրություններում այստեղից առաջադրվել էր նաև Ագրարային համալսարանի Կապանի ուսումնական կետի ղեկավար Նարինե Մովսիսյանը, ում ընդդիմադիր կեցվածքի համար խոչընդոտում էին քարոզարշավ իրականացնել: Այս անգամ տիկինը մեզ հետ զրույցում ասաց, եթե իր որոշումը մի քանի հանգամանքներից է կախված: Օրինակ, որ արժանավոր թեկնածու լինի, նա կզիջի: Կամ՝ եթե Հակոբյանները շարունակեն մենաշնորհային պայքար մղել, դարձյալ իզուր կլինի, մի խոսքով, իրավիճակը կթելադրի տիկնոջ անելիքները: «Ես միշտ այն մտքին էի, որ Վահեն ի վիճակի չի, և ես ուզում էի իմ ներուժը փորձել… և քարոզարշավին չմասնակցելով, անգամ վստահված անձ չունենալով՝ հավաքեցի բավականին ձայն»:
Քաջարանի պղնձամոլիբդենային կոմբինատի տնօրեն Մաքսիմ Հակոբյանը վստահեցնում է, որ ինքը քաղաքականությանը չի խառնվում, և այն հարցից, թե պատրաստվո՞ւմ է սեփական թեկնածուին առաջադրել կամ սատարել թիվ 38-ում, վրդովվեց. «Չեմ պատասխանելու այդ հարցին, կոմբինատի մասին հարցեր տվեք՝ պատասխանեմ, մեր ձեռնարկության մասին հարցեր տվեք՝ պատասխանեմ»:
Հոդվածն ամբողջությամբ կարող եք կարդալ «Հրապարակի» այսօրվա համարում:
