Էմիլ Բուդաղյանը հերքում է զինված հարձակման վարկածը
Գորիսի քաղաքապետի նախկին թեկնածում, հունիսի 1-ին սպանված Ավետիք Բուդաղյանի հայրը՝ Էմիլ Բուդաղյանը «Ազատություն» ռադիոկայանի հետ զրույցում իր զարմանքն է արտահայտել մյուս որդուն՝ Արտակ Բուդաղյանին մինչ օրս տուժող չճանաչելու եւ նրան որպես մեղադրյալ ներգրավելու հնարավորության մասին հնչած հայտարարությունների կապակցությամբ:
«Ո՞նց կարելի է մի մարդ, որի հրացանը որպես սուվենիր՝ ոչ կրակող հրացան էր, նա մեկի վրա հարձակում գործած լիներ», – ասել է Էմիլ Բուդաղյանը:
Մոտ 20 օր առաջ զորամասի հրամանատար, գնդապետ Արտակ Բուդաղյանը նախաքննական մարմնին միջնորդել էր իրեն տուժող ճանաչել: Նախաքննական մարմինը հետաձգել է տուժող ճանաչելու վերաբերյալ որոշումը:
Շուրջ երկու շաբաթ առաջ «Ազատություն» ռադիոկայանի հետ զրույցում Հայաստանի զինվորական դատախազ Գեւորգ Կոստանյանը չէր բացառել որեւէ զարգացում, այդ թվում՝ Արտակ Բուդաղյանին գործում որպես մեղադրյալ ներգրավելը:
Էմիլ Բուդաղյանը ասաց, որ հունիսի 1-ի դեպքերը պատկերող չմոնտաժված տեսանյութով հերքվում են Սյունիքի արդեն նախկին մարզպետ Սուրիկ Խաչատրյանի տան վրա զինված հարձակման վերաբերյալ պնդումները: Նրա հավաստմամբ՝ չմոնտաժված տեսանյութը շատ է տարբերվում հրապարակվածից:
