Բրազիլիայի նախագահը նոր բարեփոխումներ է առաջարկել ցուցարարներին
Ամերիկյան Associated Press լրատվական գործակալության փոխանցմամբ՝ Բրազիլիայի նախագահ Դիլմա Ռուսեֆն առաջարկել է 23 միլիարդ դոլար հատկացնել հասարակական տրանսպորտին: Այս մասին նա հայտարարել է երեկ՝ բողոքի ակցիաների կազմակերպիչների հետ հանդիպումից հետո: Բացի այդ, նախագահն առաջարկել է հանրաքվե անցկացնել՝ կապված քաղաքական բարեփոխումների հետ:
Ենթադրվում է, որ հատկացված միջոցները կներդրվեն քաղաքային հասարակական տրանսպորտի զարգացման նախագծերում, որի հետ կապված դժգոհությունն էլ հունիսի կեսերին հիմք հանդիսացավ Բրազիլիայում բողոքի զանգվածային ակցիաների սկսվելու համար:
Բողոքի ակցիաների կազմակերպիչների խոսքերով՝ նախագահը կոնկրետ ժամկետներ չի սահմանել իր խոստումները կատարելու համար: Նրանք խոստացել են չդադարեցնել բողոքի ակցիաները մինչև նախագահի խոստումների կատարումը:
