ՀՀ ԱԳՆ ճշտում է. Ռուսաստանում հայ շինարարին ծեծել և լոմով բռնաբարել են
ՀՀ ԱԳՆ ծանոթ է այն տեղեկությանը, համաձայն որի՝ Ռուսաստանի Կրասնոդարի երկրամասում մալուխի գողության համար ձերբակալել, այնուհետև դաժան ծեծի ենթարկել և բռնաբարել են հայազգի շինարարին: Այս մասին հաղորդում է galatv.am-ը:
«Մենք ևս տեղեկություններ ստացել ենք լրատվամիջոցներից, ծանոթ ենք նմանատիպ հրապարակումների և փորձում ենք ճշտել տեղեկությունը, թե արդյո՞ք այն համապատասխանում է իրականությանը, թե ոչ»,- ԳԱԼԱ-ի հետ զրույցում ասել է ԱԳՆ մամլո խոսնակ Տիգրան Բալայանը:
Նշենք, որ այս մասին հայտարարել է Սոչիի բնակիչ Մարդիրոս Դեմիրճյանը, համաձայն որի՝ նրա հետ դաժան են վարվել ոստիկանությունում և ստիպել ստորագրել ցանկալի փաստաթղթերի տակ:
Ըստ ռուսական լրատվամիջոցների՝ Ռուսաստանի Կրասնոդարի երկրամասում ստուգումներ են անցկացվում Սոչիի բնակիչ Մարդիրոս Դեմիրճյանի այս հայտարարության հիմքով, որի համաձայն նրան ծեծել, խոշտանգումների է ենթարկել տեղի ոստիկանությունը` պահանջելով խոստովանել օլիմպիական շինտարածքից կատարած գողությունը:
Մարդիրոս Դեմիրճյանին ձերբակալել են հունիսի 12-ին նրա ազգական Սերգեյ Կրբաշյանի հետ: Նրանց խոսքերով` ոստիկանական տեղամասում իրենց սկսել են ծեծել, խոշտանգումների ենթարկել` պահանջելով խոստովանել մալուխի գողությունը:
«Կավկազսկի ուզել» կայքին տված հարցազրույցի ժամանակ Դեմիրճյանն ասել է, որ մի քանի ժամ ծեծելուց հետո ոստիկանները երկաթե լոմով բռնաբարել են իրեն, որից հետո նա համաձայնել է ստորագրել ցանկացած ցուցմունք:
Մանրամասները՝ այստեղ:
