Ադրբեջանի խորհրդարանը բողոք-հայտարարություն է ընդունել՝ ընդդեմ Եվրախորհրդարանի որոշման
Ադրբեջանական APA լրատվական գործակալության փոխանցմամբ՝ Ադրբեջանի խորհրդարանը այսօր բողոք-հայտարարություն է ընդունել՝ կապված հունիսի 13-ին Եվրախորհրդարանի կողմից Ադրբեջանի վերաբերյալ բանաձև ընդունելու հետ:
Դրանում Եվրախորհրդարանի լիագումար նիստում Ադրբեջանի վերաբերյալ բանաձևի դիտարկումն ու ընդունումը որակվել է որպես «անհասկանալի»: Ադրբեջանի խորհրդարանն ափսոսանք է հայտնել տվյալ որոշման ընդունման կապակցությամբ:
Դրանում հիշեցվում է, որ Ադրվբեջանում դեռ չի սկսվել նախընտրական կամպանիան, որ նախագահի թեկնածուները դեռ չեն անցել գրանցման գործընթաց: Հայտարարությունում «ոչ օբյեկտիվ» է որակվել այն դիրքորոշումը, որ Ադրբեջանում խախտվում են մարդու իրավունքներն ու ազատությունները:
Հայտարարությունում ուշադրություն է հրավիրվել նրա վրա, որ Եվրախորհրդարանը տվյալ բանաձևն ընդունել է Ադրբեջանում գազային միջանցքի վերաբերյալ որոշման ընդունման և Ադրբեջանի նախագահ Իլհամ Ալիևի կողմից Բրյուսել մեկնելու նախաշեմին:
