Գագիկ Ծառուկյանն արմավիրցիներին նոր հակակարկտային կայաններ է նվիրել (տեսանյութ)
Շաբաթներ առաջ տեղացած ուժեղ կարկուտը հաշված րոպեների ընթացքում գետնին հավասարեցրեց ամբողջ տարվա ապրուստը: ԲՀԿ նախագահ Գագիկ Ծառուկյանն առաջիններից մեկն էր, ով անձամբ շտապեց հանդիպել Արմավիրի մարզում կարկուտից տուժած բնակիչներին և աջակցելու պատրաստակամություն հայտնեց:
Գագիկ Ծառուկյանը տեղեկացրեց, որ ինքնարժեքով գյուղացիներին տրամադրած ավելի քան երկու հարյուր միլիոն դրամ արժողության բուժանյութերի և պարարտանյութերի գումարն այլևս ստիպված չեն լինի վճարել: Լսելով գյուղացիների մտահոգությունները և ընդառաջելով նրանց խնդրանքին՝ Գագիկ Ծառուկյանը հենց տեղում խոստացավ, որ իր աջակցությամբ ամենասեղմ ժամկետներում հակակարկտային կայաններ կտեղադրվեն Արմավիրի մարզի առավել մեծ վնասներ կրած Հացիկ, Բամբակաշատ, Նոր Արտագերս, Արմավիր և Մրգաշատ գյուղերում:
ԲՀԿ առաջնորդի խոստմանն անմիջապես հաջորդեցին հակակարկտային կայանների տեղադրման աշխատանքները: Խոստացված մեկ ամսվա փոխարեն հաշված օրեր անց տրված խոստումն իրականություն դարձավ, արդարացվեցին նաև գյուղացիների ակնկալիքները: Գագիկ Ծառուկյանն անձամբ այցելեց Արմավիրի մարզի Հացիկ գյուղ՝ կիսելու բնակիչների համընդհանուր ոգևորությունն ու մասնակցելու կայանի շահագործման արարողությանը:
Շնորհակալություն հայտնելով ջերմ ընդունելություն համար՝ Գագիկ Ծառուկյանը նշեց, որ գյուղն ու գյուղացին` իրենց բոլոր հոգսերով ու խնդիրներով, շարունակում են առաջնահերթ լինել իր համար: ԲՀԿ առաջնորդը ևս մեկ անգամ հավաստիացրեց, որ գյուղացիներին մտահոգող ոչ մի խնդիր իր ուշադրությունից երբևէ չի վրիպելու:
Բնակիչների խնդրանքով Գագիկ Ծառուկյանն այցելեց նաև գյուղի մշակույթի տուն, որի արտաքին բարեկարգման և վերանորոգման խնդիրը լուծում է ստացել հենց «Գագիկ Ծառուկյան» բարեգործական հիմնադրամի աջակցությամբ: ԲՀԿ առաջնորդը խոստացավ, որ մինչև սեպտեմբեր ավարտին կհասցվեն նաև շինության ներքին հարդարման և նորոգման աշխատանքները: Գյուղացիները ուրախությամբ փաստեցին, որ հատկապես իրենց գյուղին և առհասարակ Արմավիրի մարզին Գագիկ Ծառուկյանի շարունակական աջակցությունը համակողմանի բնույթ է կրում:
Մարզի Մրգաշատ համայնքում ևս Գագիկ Ծառուկյանը սպասված ու ցանկալի հյուր էր: ԲՀԿ առաջնորդի աջակցությամբ այստեղ ևս լուծում է ստացել հակակարկտային կայանի տեղադրման առաջնահերթ խնդիրը: Գյուղի բնակիչների հետ ջերմ ու անմիջական զրույցի ընթացքում Գագիկ Ծառուկյանը նշեց, որ անելու է հնարավորն ու անհնարինը, որպեսզի հայ գյուղացին իր առօրյա հոգսերը հաղթահարելիս իրեն միայնակ չզգա, հավատա, որ իր մասին հոգում են ու մտածում: Գյուղի բնակիչները Գագիկ Ծառուկյանին տեղեկացրին, որ համայնքի միակ մանկապարտեզը ջեռուցման կարիք ունի: Հենց տեղում ԲՀԿ առաջնորդը խոստացավ՝ մինչև սեպտեմբեր հարցն ամբողջությամբ լուծում կստանա: Հանդիպման ավարտին Գագիկ Ծառուկյանը շեշտեց, որ իր հանդիպումները գյուղացիների հետ այսուհետ ևս շարունակական բնույթ կունենան, լուծում կստանան նաև բարձրաձայնված բոլոր առաջնահերթ խնդիրները:
ԲՀԿ լրատվական ծառայություն
