Թուրքիայում ձերբակալվել է թունավոր նյութերով հարձակում պլանավորած 12 սիրիացի
Թուրքական Ihlas լրատվական գործակալության փոխանցմամբ՝ Ադանայում իրականացված հատուկ գործողության արդյունքում ձերբակալվել է 12 սիրիացի: Խոսքը գնում է «Ալ-Քաիդա» ահաբեկչական կազմակերպության հետ կապված «Ջաբհաթ ան-Նուսրա» խմբավորման անդամների մասին:
Նշվում է, որ այդ անձինք պլանավորել էին Թուրքիայի տարածքում իրականացնել ահաբեկչական հարձակումներ: Նրանց մոտ հայտնաբերվել են քիմիական նյութեր: Թուրքական կողմը ճշգրտում է, թե ինչ նյութեր են դրանք և ինչ կարող է ստացվել դրանց միացությունից:
Մի շարք լրատվամիջոցներ գրել են, որ հայտնաբերվածը զարին գազ է: Ձերբակալվածների բնակարաններում հայտնաբերվել են մեծ քանակությամբ փաստաթղթեր: Տարվում է հետաքննություն:
