Ադրբեջանի ներքին գործերի նախկին նախարարը զգուշացվելուց հետո ազատ է արձակվել
Ադրբեջանական Turan լրատվական գործակալության փոխանցմամբ՝ երեկ ձերբակալված Ադրբեջանի ներքին գործերի նախկին նախարար Իսքանդեր Համիդովն ազատ է արձակվել նույն օրը: Նրան ձերբակալել էին տեղական ժամանակով ժամը 15.00-ի մոտ և ազատ են արձակել դրանից 3.5 ժամ անց:
Համիդովը հայտարարել է, որ ոստիկանատանն իրեն հարցաքննել են մայիսի 28-ին Նովխանում անցկացված հանրահավաքում ունեցած ելույթի համար և զգուշացրել են, որ այլևս հանդես չգա նման հայտարարություններով:
Համիդովը հավելել է, որ ի պատասխան դրա՝ ոստիկաններին խոստացել է այսուհետ անել ավելի կտրուկ հայտարարություններ: Համիդովի նկատմամբ պաշտոնական մեղադրանք չի ներկայացվել:
