Կիբերհանցագործության հետքերը տանում են Լոռու մարզի Լեռնահովիտ գյուղ
ՀՀ ոստիկանության քննչական գլխավոր վարչության հատկապես կարևոր գործերով քննության վարչությունը քրեական գործ է հարուցել և Լոռու մարզի Լեռնահովիտ գյուղի 18-ամյա բնակիչ Արման Մխոյանին առաջադրել կիբերհանցագործությունների մեղադրանք՝ մի քանի դրվագներով:
Այսպես, ըստ մեղադրանքի, Արման Մխոյանը վնասաբեր ծրագրի հնարավորություններն օգտագործելու արդյունքում համապատասխան օգտատերերի անհատական Էջեր մուտք գործելու համար անհրաժեշտ տվյալներին տիրապետելուց հետո ապօրինի տիրացել է Գևորգ Սաֆարյանի, Կարեն Բավեյանի և Սեյրան Կարապետյանի անհատական համացանցային Էջերին՝ դրանով իսկ զրկել է նրանց սեփական անհատական էջերի օգտագործման հնարավորությունից և պատճառել նրանց բարոյական վնաս։
Ըստ մեղադրական եզրակացության, նա 2012 թ. փետրվարի սկզբներին սոցիալական կայքի օգտատեր Գևորգ Սաֆարյանին առաջարկել է իր անհատական էջի համապատասխան հատվածում լրացնել էջ մուտք գործելու համար պահանջվող մուտքանունն ու գաղտնագիրը։ Վերջինս, գտնվելով մոլորության մեջ, կատարել է այդ պահանջը, պահանջվող մուտքանունն ու գաղտնագիրը պատճենահանվել և անմիջապես փոխանցվել են Արման Մխոյանի կողմից օգտագործվող վնասաբեր ծրագրի բաղկացուցիչ մասը կազմող ծրագրային ֆայլին, որի միջոցով վերջինս ապօրինի տիրացել է Գևորգ Սաֆարյանի՝ համակարգչային տեղեկատվություն պարունակող անհատական էջին, փոխել է տվյալ էջի գաղտնագիրը՝ զրկելով նրան հետագա հնարավորությունից՝ օգտվելու իր անհատական էջից:
2012 թվականի փետրվար ամսվա սկզբներին նույն կերպ մեղադրյալը անվճար խաղային միավորներ տրամադրելու վերաբերյալ իրականությանը չհամապատասխանող առաջարկ պարունակող հղումն ուղարկել է Գևորգ Սաֆարյանի հետ www.odnoklassniki.ru սոցիալական կայքի Друзья բաժնում գտնվող Կարեն Բավեյանի և Սեյրան Կարապետյանի անվանմամբ անհատական էջերին, ինչի հետևանքով էջերն «օտարվել են» մոլորության մեջ հայտնված օգտատերերից:
Դրանից հետո 2012թ. հուլիսի 2-ին առանց թույլտվության՝ գաղտնագրի կիրառմամբ, ներթափանցելով Լուսինե Կարապետյանի՝ սոցիալական կայքի անհատական էջ, փոխելով պաշտպանիչ տվյալները, ապօրինի տիրացել է տվյալ անհատական էջին, այնուհետև այն վերադարձնելու համար Լուսինե Կարապետյանի հետ կատարված նամակագրությունների միջոցով պահանջել և 2012թ. հուլիսի 13-ին նույն անհատական էջի միջոցով ստացել է ընդհանուր 5000 դրամ արժողությամբ «Ղ.–Տելեկոմ» ՓԲԸ-ի «Վիվա-Սելլ» բջջային ցանցի թվով հինգ 1000-ական ՀՀ դրամի բջջային հեռախոսի լիցքավորման քարտերի թվային տվյալներ: Ստանալով լիցքավորման քարտի տվյալները՝ դրանց միջոցով լիցքավորել է իր բջջային հեռախոսները: Իսկ Լուսինե Կարապետյանի անհատական էջը վերադարձրել է նրան:
Մեղսագրվող արարքների համար Արման Մխոյանին մեղադրանք է առաջադրվել ՀՀ քրեական օրենսգրքի 254-րդ 256-րդ հոդվածների առաջին մասերով՝ Համակարգչային տեղեկատվությանն ապօրինի տիրանալը և Վնասաբեր ծրագրեր մշակելը, օգտագործելը և տարածելը: ՀՀ գլխավոր դատախազության ազգային անվտանգության և կիբերհանցագործությունների գործերով վարչության պետի տեղակալ Ա.Հարությունյանը հաստատել է մեղադրական եզրակացությունը եւ գործն ուղարկել դատարան։
Արման Մխոյանը մայիսի 31-ին կկանգնի դատարանի առջև՝ գործի քննվի Լոռու մարզի ընդհանուր իրավասության դատարանում՝ դատավոր Նարինե Հովակիմյանի նախագահությամբ:
