Բիձինա Իվանիշվիլին չի բացառել, որ կարող է ներկա գտնվել Սոչիում կայանալիք Օլիմպիական խաղերին
Новости-Грузия լրատվական գործակալության փոխանցմամբ՝ Վրաստանի վարչապետ Բիձինա Իվանիշվիլին ռուսական կողմից չի ստացել պաշտոնական հրավեր՝ 2014 թվականին Սոչիում կայանալիք Ձմեռային օլիմպիական խաղերին ներկա գտնվելու համար:
Չնայած դրան՝ Իվանիշվիլին լրագրողների հետ զրույցում չի բացառել, որ կարող է հաջորդ տարի մեկնել Սոչի. «Ես չեմ ստացել պաշտոնական հրավեր: Չգիտեմ՝ արդյոք ներկա կգտնվե՞մ Օլիմպիական խաղերին: Տեսնենք, թե ինչպես կզարգանան մեր հարաբերությունները: Ես չեմ բացառում, որ կարող եմ մեկնել այնտեղ, սակայն չկան լուրջ հիմքեր՝ կոնկրետ պատասխան տալու համար»:
Վրաստանի Ազգային օլիմպիական կոմիտեի անդամները մայիսի 2-ի արտահերթ նիստում քվեարկել են Սոչիի օլիմպիական խաղերին վրացի մարզիկների մասնակցության օգտին:
