Էրդողանը Դևիդ Քեմերոնի ու Ֆրանսուա Օլանդի հետ քննարկել է Սիրիայի հարցը
CNN Türk-ի փոխանցմամբ՝ Թուրքիայի վարչապետ Ռեջեփ Էրդողանը հեռախոսազրույցներ է ունեցել Մեծ Բրիտանիայի վարչապետ Դևիդ Քեմերոնի և Ֆրանսիայի նախագահ Ֆրանսուա Օլանդի հետ: Այս մասին հայտնել են կառավարությունում եղած աղբյուրները:
Վերջիններիս հաղորդմամբ՝ Էրդողանը Քեմերոնի ու Օլանդի հետ, երկկողմանի հարաբերություններից բացի, քննարկել է նաև մի շարք միջազգային հարցեր և գլխավորապես Սիրիայի հարցը:
Հեռախոսազրույցի ժամանակ Քեմերոնն Էրդողանին հրավիրել է Լոնդոն, ուր երեքշաբթի կայանալու է Սոմալիի մասին կոնֆերանսին: Սակայն Էրդողանը հայտնել է, որ այդ կոնֆերանսին պետք է մասնակցի արտգործնախարար Ահմեթ Դավութօղլուն:
Ֆրանսուա Օլանդի հետ էլ Էրդողանը քննարկել է էներգետիկ ոլորտում համագործակցության հարցը, երկկողմանի հարաբերությունների և ԵՄ-ին Թուրքիայի անդամակցության հարցերը: Քննարկվել է նաև Սիրիայի ու Մալիի հարցերը:
