Թուրքիան «լողացող հիվանդանոց» է գնում ԱՄՆ-ից
Թուրքական Star թերթի փոխանցմամբ՝ Թուրքիան դառնում է աշխարհի այն սակավաթիվ երկրներից մեկը, որը կունենա հոսպիտալային (հիվանդանոց) նավ: Դրա գնման հարցով ապրիլի 18-ին ԱՄՆ է մեկնելու Թուրքիայի առողջապահության նախարար Մեհմեթ Մուեզինօղլուն:
Վերջինս այնտեղ քննարկելու է Mercy անվանմամբ վիթխարի հոսպիտալային նավի գնման հարցը: Նավի գնումը կարևորվում է ափամերձ շրջաններում հնարավոր աղետների դեպքում բժշկական արդյունավետ օգնություն ցուցաբերելու տեսանկյունից: Նավը կօգտագործվի նաև արտակարգ և նորմալ իրավիճակներում:
ԱՄՆ-ում ընդունված է ռազմանավերը վերածել «լողացող հիվանդանոցների»: Եվ քանի որ Թուրքիան երեք կողմից շրջապատված է ծովերով, ուստիև որոշվել է ունենալ նմանատիպ 3 նավ: Mercy նավն ունի բժշկական 13 բաժանմունք (այդ թվում նաև դիահերձարան) և 1000 մահճակալ:
