Ինչպես է առևտուրը կենտրոնացնում խոշոր բիզնեսի ձեռքում
Մինչ հայրենի իշխանությունները հայտարարում են փոքր ու միջին բիզնեսը զարգացնելու մասին, վիճակագրությունը ցույց է տալիս, որ փոքր բիզնեսի դերն ու կշիռը ՀՀ տնտեսության մեջ գնալով փոքրանում է։ Օրինակ՝ ներքին առևտրաշրջանառության ոլորտում։
Այսպես, Ազգային վիճակագրական ծառայության կողմից հրապարակված տվյալների համաձայն, այս տարվա հունվար-փետրվարին մանրածախ առևտրաշրջանառության ծավալը հանրապետությունում աճել է 5%-ով և կազմել 168.6 միլիարդ դրամ։
Սակայն եթե խոշոր խանութների միջոցով իրականացված առևտրի ծավալները աճել են 17.9%-ով, կրպակների շրջանառությունը նվազել է 18.8%-ով, գյուղատնտեսական արտադրանքի շուկաներինը՝ 14.8%-ով, իսկ սպառողական ապրանքների շուկաներինը՝ 41.8%-ով։
Արդյունքում, խանութների միջոցով իրականացված առևտրաշրջանառության ծավալները իրենց տեսակարար կշռով հասել են 70.3%-ի։
