Ազնավուրի հարցազրույցը` Սփյուռքի և Անկարայի միաժամանակյա քննադատության թիրախ
Շառլ Ազնավուրը հայտնվել է թուրքական իշխանությունների և շվեյցարահայ համայնքի խաչաձև քննադատության տարափի տակ: Ինչպես տեղեկացնում է Ազատություն ռադիոկայանը, դա տեղի ունեցավ այն բանից հետո, երբ մարտի 24-ին շվեյցարական խոշորագույն ֆրանսալեզու հեռուստաալիքին` RTS-ին տված ծավալուն հարցազույցում Ազնավուրը հանդես եկավ մի շարք կտրուկ հայտարարություններով` մասնավորաբար ասելով, թե «թքած ունի Ցեղասպանություն բառի վրա, քանի որ իր համար առավել մեծ կարևորություն ունի պատմական փաստերի ճանաչումը»:
Շվեյցարիայի հայ համայնքի ամենաակտիվ գործիչներից մեկը` Շվեյցարիա – Հայաստան խորհրդարանական խմբի գլխավոր քարտուղար Սարգիս Շահինյանը «Ազատություն» ռադիոկայանին տված հարցազրույցում այսօր պնդում էր, որ բարձր դիվանագիտական պաշտոն զբաղեցնող շանսոնյեի հայտարարությունները «իրական ծաղր են» միջազգային ասպարեզում պաշտոնական Երևանի գործադրած ջանքերի հանդեպ:
«Հայաստանի դեսպանը, այն էլ եռապատիկ` Շվեյցարիայում, ՅՈւՆԵՍԿՕ-ում և ՄԱԿ-ի կառույցներում, չի կարող իր կառավարության դիրքորոշմանը հակառակ կարծիք հայտնել` ասելով, թե ինքը «թքած ունի ցեղասպանություն բառի վրա»: Որքան էլ կարևոր լինի հասկացնելը, որ իրականությունը բառերի վրա խաղալը չէ, այլ բուն էությունն է, որ Թուրքիայի կառավարությունը պետք է ընդունի աղետի ծանրությունը, այնուհանդերձ, Հայաստանը ներկայացնող որևէ դեսպան չի կարող հանդես գալ նման հայտարարությամբ: Այն էլ երկու օր անց այն բանից, երբ ՄԱԿ-ում ցեղասպանությունների կանխարգելման մի բանաձև էընդունվում, որի շարժիչ ուժերից մեկը նաև Հայաստանի կառավարությունն էր», – ասաց Շահինյանը:
«Եվ ի վերջո, ի՞նչ է նշանակում` թքած ունենալ ցեղասպանություն բառի վրա: Ցեղասպանություն բառը մի իրողություն է, որ ծանր կերպով հարվածել է ողջ հայ ժողովրդին` այդ թվում հենց Ազնավուրի ընտանիքին: Ի վերջո, կան շատ ավելի բարձրաստիճան ատյաններ, քան Ազնավուրը, որոնք զբաղված են ցեղասպանության կանխարգելմամբ ու դատապարտմամբ», – ընդգծեց շվեյցարահայ գործիչը` հավելելով, որ ցավալի է, երբ նման հայտարարությամբ հանդես է գալիս Շվեյցարիայում Հայաստանի շահերը ներկայացնող դեսպանը:
«Մեզ համար այս մոտեցումն անընդունելի է, քանի որ հենց շվեյցարացի խորհրդարանականներն էին, որ տասնյակ տարիներ շարունակ Ազնավուրի «թքած» այդ բառի համար սարսափելի լարված պայքար տարան, և ի վերջո 2003 թվականին Շվեյցարիայի Ազգային Ժողովը ճանաչեց այդ բառը որպես իրողություն», – նշեց Սարգիս Շահինյանը:
Ազնավուրի այս հարցազրույցի մեկ այլ հատված էլ լուրջ դժգոհություն առաջացրեց Անկարայում:
Շվեյցարական հեռուստաալիքի եթերում Ազնավուրն ասել էր. – «Մի անգամ Թուրքիայի վարչապետը հայտարարեց, թե ինքը ատում է հայերին ու հույներին: Երկրի կառավարության ղեկավարը չի կարող հանդես գալ նման հայտարարություններով»:
Սրան ի պատասխան` Թուրքիայի արտաքին գործերի նախարարության մամուլի խոսնակ Լևենթ Գյումրուքչուն երեկ գրավոր հայտարարություն տարածեց, որում նշում էր. – «Մենք չենք կարողանում հասկանալ, թե ինչ փաստերի վրա հիմնվելով է հնչեցվել այդ հայտարարությունը: Մենք խստորեն դատապարտում ենք այդ անիմաստ ու հիմնազուրկ պնդումները: Թուրքերը հայերի և հույների հետ խաղաղ համակեցության երկարատև փորձ ունեն»:
Միաժամանակ, թուրքական դիվանագիտական գերատեսչության խոսնակը բավական դրական կերպով է արտահայտվել Ազնավուրի հարցազրույցի` իր բնորոշմամբ կառուցողական հատվածի վերաբերյալ:
«Մենք ողջունում ենք Ազնավուրի նման աշխարհահռչակ արվեստագետի ու մտավորականի` հայ – թուրքական հարաբերությունների բարելավման անհրաժեշտության մասին հայտարարությունները», – նշել է թուրքական ԱԳՆ-ի խոսնակը:
Սարգիս Շահինյանի խոսքով`«շատ հետաքրքրական է, որ թուրքերը Ազնավուրի հայտարարության մի մասն ընդունում են, մյուսը` ոչ»:
«Ազնավուրի հայտարարությունը սարսափելի վտանգավոր է, քանի որ հնարավորություն է տալիս թուրքական կառավարությանն ասել` «նրա հայտարարության այս մի հատվածն ընդունում ենք, մյուս հատվածը` ոչ»: Մենք միջազգային ատյաններում մեզ ծաղրական դրության մեջ ենք դնում: Այն ուժերը Թուրքիայում և Թուրքիայից դուրս, որ զբաղված են Ցեղասպանության ժխտմամբ, այս ամենից կարող են հստակ դիվիդենտներ քաղել», – համոզված է Հայաստան – Շվեյցարիա խորհրդարանական խմբի քարտուղարը:
