Արմեն Աշոտյանը կաջակցի՞ եզդիներին
Հայաստանաբնակ եզդի ժողովուրդն ունի եզդիերենի մասնագետների կարիք: Այս մասին այսօր 168.am-ի հետ զրուցում ասաց «Սինջար» հասարակական կազմակերպության նախագահ Բորիս Մուրազին: Նրա խոսքով` մեկ տարի առաջ «Սինջարը» դիմել էր ՀՀ Կրթության և գիտության նախարար Արմեն Աշոտյանին՝ որպեսզի իրենց կրթական ծրագրերին աջակցեն:
«Ուզում ենք, որպեսզի եզդիների համար եզդիերեն դասընթացներ լինեն, մասնագետներ պատրաստվեն, ովքեր կիմանան հասարակ եզդի քաղաքացուց մի փոքր ավելին: Արմեն Աշոտյանն ասել էր, որ ազգային փոքրամասնությունների ցանկացած նախաձեռնության իրենք աջակից կլինեն»,- մեզ հետ զրույցում ասաց Բորիս Մուրազին:
Նշենք, որ առաջարկված նախաձեռնությունը ընթացք չէր ստացել այն պատճառով, որ նախարարությունը ֆինանսավորում չէր ունեցել: Այսօր «Սինջար» կազմակերպությունը կփորձի հստակ ծրագրով դիմել նախարարություն: «Մենք հիմա նախարարությանը կդիմենք, որպեսզի աջակցեն մեր՝ ազգությամբ եզդի երկու քաղաքացիների Իրաք մեկնելուն և այնտեղ գիտելիքներ ստանալուն»,- ասաց Բորիս Մուրազին:
