Մարդահամարի նախնական արդյունքները. առկա բնակչության թիվը՝ 2 871 771 մարդ
ՀՀ Ազգային վիճակագրական ծառայությունն այսօր ամփոփել է 2011 թվականի հոկտեմբերի 12-21-ը Հայաստանի Հանրապետությունում անցկացված մարդահամարի նախնական արդյունքները։
Նախնական տվյալների համաձայն, մշտական բնակչության թիվը եղել է 3 018 854 մարդ, իսկ առկա բնակչության թիվը՝ 2 871 771 մարդ (վարչական շրջանում առկա բնակչության թվաքանակի ցուցանիշը ձևավորվում է դրանում մշտապես (սովորաբար) բնակվող ու հաշվառման պահին ներկա և ժամանակավոր ներկա հաշվառված անձանց ընդհանուր թվաքանակների հանրագումարից)։
Պաշտոնական տվյալներով, ՀՀ 2001թ. մարդահամարի համեմատությամբ, առկա բնակչության թվաքանակի ցուցանիշը` ըստ հաշվառման պահի, նվազել է 130 823 մարդով, իսկ մշտական բնակչությանը` 194 157 մարդով:
Ըստ ՀՀ 2011թ. մարդահամարի նախնական արդյունքների ՀՀ մշտական բնակչության 36.7 % կազմում է գյուղական բնակչությունը, իսկ 63.3 %` քաղաքայինը, ինչի գերակշիռ մասը (55.5 %) բաժին է ընկնում մայրաքաղաք Երևանին:
