Վրաստանի խորհրդարանը քննարկում է Իվանիշվիլիի կառավարության ծրագիրը
Այսօր Քութայիսիում` Վրաստանի խորհրդարանի նորակառույց շենքում պատգամավորները կսկսեն քննարկել Բիձինա Իվանիշվիլիի կառավարության ծրագիրը: Այս մասին տեղեկացնում է «Ազատություն» ռադիոկայանը:
Որևէ կասկած, որ ծրագիրը կհաստատվի, իսկ Իվանիշվիլին կստանձնի վարչապետի պաշտոնը, չկա, քանի որ հոկտեմբերի 1-ի ընտրություններում հաղթած «Վրացական երազանք» դաշինքը 150-տեղանոց նորընտիր խորհրդարանում 85 տեղ ունի:
Չնայած դրան, Բիձինա Իվանիշվիլին նախօրեին ստիպված է եղել բուռն քննարկումների մասնակցել` մի շարք կոշտ հարցադրումների պատասխանելով: Դա տեղի ունեցավ վարչապետի թեկնածուի և խորհրդարանական ընդդիմության հանդիպման ժամանակ:
Վրացական օրենսդրության համաձայն, կառավարության ղեկավարի պաշտոնում առաջադրված անձը պետք է իր ծրագիրն առանձին հանդիպման ժամանակ ներկայացնի նաև խորհրդարանում ներկայացված ընդդիմադիր խմբակցություններին:
Բնական է, որ նախագահ Միխեիլ Սաակաշվիլիի Ազգային միացյալ շարժման պատգամավորներին առաջին հերթին հետաքրքրում էր Իվանիշվիլիի մոտեցումը Ռուսաստանի հետ հարաբերություններին և Աբխազիայում ու Հարավային Օսիայում ստեղծված կացությանը:
«Մենք պետք է անենք ամեն ինչ Վրաստանի տարածքային ամբողջականությունը վերականգնելու և մեր աբխազ ու օս եղբայրներին հետ բերելու համար: Ինչ վերաբերում է 2008 թվականի պատերազմին, ապա դա մեծ սադրանք էր, որը ծրագրեցիք դուք ձեր Գլխավոր հրամանատարի հետ միասին,- դիմելով Սաակաշվիլիի կողմնակիցներին` հայտարարել է Իվանիշվիլին` հավելելով,- Ռուսաստանը չէր կարողանում իրականացնել իր դարավոր երազանքը` անցնել Կովկասյան լեռներից այս կողմ: Սաակաշվիլին, սակայն, ռուսներին ընձեռեց այդ հնարավորությունը` նման սադրանք ձեռնարկելով»:
Բացի այդ, Իվանիշվիլին ներկաների համար բավական անսպասելիորեն հայտարարել է, որ վրացական քաղաքական ասպարեզում երկար մնալու ցանկություն չունի:
«Մեկ տարի է արդեն, ինչ քաղաքականությամբ եմ զբաղվում: Այժմ, երբ հաղթել ենք ընտրություններում, կարող եմ հստակ ասել. ևս մեկուկես տարի` և ես կլքեմ քաղաքականությունը, բայց ոչ Վրաստանը: Հեռանալով սակայն` ես չեմ հրաժարվի նախընտրական շրջանում հնչեցրած իմ խոստումներից: Ես պատրաստվում եմ դառնալ քաղաքացիական հասարակության ակտիվ անդամներից մեկը` վերահսկելով այն կառավարության գործունեությունը, որից հեռանում եմ»,- ասել է Իվանիշվիլին` դիմելով ընդդիմադիր պատգամավորներին:
