ԱՄՆ-ում տների վաճառքի ծավալները նվազել են 1.7%-ով
ԱՄՆ անշարժ գույքի շուկայում տների վաճառքի ծավալները սեպտեմբերին կրճատվել են 1.7%-ով՝ օգոստոսի համեմատ: Այդ մասին նշվում է ԱՄՆ Ազգային անշարժ գույքի ասոցիացիայի հաշվետվությունում:
Օգոստոսին, տվյալների վերահաշվարկից հետո, գրանցվել էր աճ՝ 8.1%, մինչև 4.83 մլն տուն, այլ ոչ թե 7.8%, ինչպես ավելի վաղ էր հայտարարվել:
Մինչ այդ Bloomberg-ի վերլուծաբանները կանխատեսել էին վաճառքի ծավալների կրճատում օգոստոսյան ցուցանիշից՝ 1.6%-ի չափով՝ մինչև 4.75մլն տուն: Վաճառքի ծավալների նվազումը պայմանավորված է վաճառքի հանված տների քանակի կրճատմամբ։
Տան միջին արժեքը նախորդ տարվա սեպտեմբերի համեմատ՝ աճել է 11.3%-ով՝ մինչև 183,9 հազար դոլար: Այն 2005թ.-ից առավելագույն ցուցանիշն է:
Փորձագետները նշում են, որ հիպոթեքային վարկավորման ցածր տոկոսադրույքները դրդում են գնորդին վարկ վերցնել և տուն գնել, սակայն զբաղվածության մակարդակի նվազումն, ամեն դեպքում, բարձրացնում է վարկերի անվերադարձելիության ռիսկը:
