Ռուս-թուրքական հարաբերությունները չեն տուժել. Լավրով
Անկարայում հարկադրաբար վայրէջք կատարած ուղեւորատար օդանավի հետ կապված միջադեպը չի անդրադառնա ռուս-թուրքական հարաբերությունների վրա: «Ազատության» փոխանցմամբ` նման հայտարարություն է արել Ռուսաստանի արտգործնախարար Սերգեյ Լավրովը:
«Վստահեցնում եմ, որ ռուս-թուրքական հարաբերությունների առնչությամբ անհանգստանալու հիմքեր չկան»,- «Նովոստի» գործակալության փոխանցմամբ ասել է Լավրովը։
Ռուսաստանը թուրքական կողմից ակնկալում է պարզաբանումներ միջադեպի վերաբերյալ:
Անցյալ շաբաթ թուրքական կործանիչները հարկադրել էին Մոսկվայից Դամասկոս ուղեւորվող սիրիական Airbus A-320 օդանավին վայրէջք Անկարայի օդանավակայանում:
Մեկնաբանելով միջադեպը, Լավրովը հերթական անգամ ընդգծել է, որ ինքնաթիռով տեղափոխվող բեռը «պատկանում էր ռուսաստանյան ընկերության եւ նախատեսված էր սիրիական կողմի համար»։
