Աբրահամյանը պատասխանել է Փոստանջյանի նամակին
Ինչպես հայտնի է` «Ժառանգություն» խմբակցության անդամ Զարուհի Փոստանջյանը նամակով դիմել էր խորհրդարանի բոլոր պատգամավորներին` առաջարկելով միանալ իր նախաձեռնությանը և փոխել Ընտրական օրենսգրքի 60-րդ հոդվածը:
Այդ հոդվածը սահմանում է, որ արտասահմանում գտնվող ՀՀ քաղաքացիներից ընտրելու իրավունք ունեն միայն դիվանագիտական, հյուպատոսական ներկայացուցչությունների աշխատակիցները, նրանց ընտանիքի անդամները և ՀՀ-ում գրանցված իրավաբանական անձանց արտասահմանյան ներկայացուցչությունների աշխատակիցները և ընտանիքի անդամները:
Փոստանջյանն առաջարկում է, որ պետությունն արտասահմանում գտնվող ՀՀ բոլոր քաղաքացիների համար ընտրական իրավունքի իրացման հնարավորություն ստեղծի: Զարուհի Փոստանջյանը մեզ հայտնեց, որ իր նամակին ՀՀԿ խմբակցությունից պատասխանել է միայն ԱԺ նախագահ Հովիկ Աբրահամյանը, ով իր նամակում գրել է, որ առաջարկվող փոփոխությունն իրենց համար անընդունելի է:
