Նախկին նախարարի որդին հորից ավելի հարուստ է
Տրանսպորտի և կապի նախկին նախարար Մանուկ Վարդանյանը նոր կոալիցիոն կառավարությունում միակ «իշխանական» նախարարն էր, ում հեռացրին աշխատանքից: Նա այդ պաշտոնում էր նշանակվել ՕԵԿ-ական քվոտայով:
Մանուկ Վարդանյանը 2009-2010 թթ. ՀՀ նախագահի խորհրդականն էր, մինչ այդ՝ կադաստրի պետական կոմիտեի նախագահը, իսկ 2010 թ. մարտի 15-ից մինչև այս տարվա հունիսը՝ ՀՀ տրանսպորտի և կապի նախարարը: Խոսակցություններ կան, որ առաջիկայում ևս պաշտոնի է նշանակվելու:
Մանուկ Վարդանյանի 2011թ. գույքի ու եկամուտների հայտարարագիրից պարզվում է, որ ինքը և իր ընտանիքի անդամներն այնքան էլ «համեստ» եկամուտներ չունեն:
Նշված տարում, նախկին նախարարն ունեցել է 2 մլն 967 հազար 600 դրամի եկամուտ, որն աշխատավարձն է, սակայն Մանուկ Վարդանյանի հաշվեհամարին 2011թ. սկզբին եղել է 205 հազար դոլար, իսկ տարեվերջին՝ 200 հազար:
Մանուկ Վարդանյանի կինը՝ Նելլի Ղալթախչյանը, ըստ հայտարարագրի, նախորդ տարի որևէ տեղ չի աշխատել և եկամուտ չի ունեցել, սակայն նրա հաշվեհամարին եղել է 40 հազար դոլար:
Ընտանիքի անդամներից ամենահարուստը նախկին նախարարի որդին է՝ Վարդան Վարդանյանը: Մեր տեղեկություններով՝ նա այժմ «Արմէկոնոմբանկում» մասնագետ է աշխատում և աշխատանքի է գնում «Range Rover» մակնիշի թանկարժեք ավտոմեքենայով:
Վարդան Վարդանյանը 2011թվականին աշխատավարձի տեսքով որևէ եկամուտ չի ստացել: Նախկին նախարարի որդու եկամուտը գոյացել է միայն ավանդից ստացած տոկոսագումարից, որը զգալի գումար է՝ 7 մլն 188 հազար դրամ: Վարդան Վարդանյանը 2011 թվականի սկզբին իր հաշվեհամարին ունեցել է 315 մլն դրամ, որը նվազելով տարեվերջին հասել է 5 մլն դրամի: Բացի դրանից՝ մեկ տարվա ընթացքում նա իր հաշվեհամարին կուտակել է 900 հազար դոլար:
