«ՀԱԿ ԱԺ պատգամավորության խմբակցությունից հեռացնել Ա.Մանուկյանին, Գ.Ջհանգիրյանին և Լ.Սարգսյանին». Ռ. Թորոսյան
«ՄԻ-96» Կուսակցության վարչությունը հայտարարություն է տարածել, որը վերնագրված է` «ՀԱԿ հեղինակության բարձրացման մասին»: Հայտարարության մեջ մասնավորապես ասված է.
«Ակնհայտ է, որ ՀԱԿ հեղինակությունը շարունակում է ցավալի անկում ապրել, որի մեղավորն ինքնակոչ «կենտրոնական գրասենյակն է»` իր անվերադարձ ինքնասիրահարված առաջնորդի թույլ տված կոպիտ սխալներով (այսպես անվանենք), մասնավորապես՝
- Ավազակաիշխանության, այդ թվում, 1995-1997թթ., դեմ պայքարի, հատկապես՝ ընտրական, փորձի հաշվի չառնելը,
- ՀԱԿ հռչակագրային ճանապարհից շեղվելը և դեմագոգիկ գործունեությունը,
- ՀՀԿ ղեկավարին լեգիտիմացնելը ՀՀ Նախագահի պաշտոնում,
- ԲՀԿ-ին ընդդիմություն դարձնելը,
- ՀԱԿ-ի վերածումը, ինչ-որ կենտրոնական գրասենյակի, այն էլ՝ ՀՀՇական:
Արդյունքում, ծայրահեղ լկտիացած ավազակաիշխանությունն իրեն համարելով իշխանության հավերժական տերը, արդեն իսկ խաղեր է կազմակերպում 2017-18թթ. ընտրական հաղթանակների համար՝ ԲՀԿ մեծամասնությամբ: Վերջինիս «ընդդիմադիր» հեղինակության բարձրացմանն ուղղված, տխմարությանը հասնող, վերջին բեմականացումը դրա վառ ապացույցն է:
Այդ կապակցությամբ, հ ա յ տ ա ր ա ր ու մ ե ն ք, որ ՀՀԿ-ԲՀԿ ավազակաիշխանության գերեզմանափորն այսօր կարող է լինել միայն Հռչակագրային ՀԱԿ-ը, որը պարտավոր է իրեն պատկանող տեղը զբաղեցնել երկրի քաղաքական կյանքում և այդ նպատակով նրա քաղխորհրդին առաջարկում ենք՝
- թույլ չտալ ՀԱԿ անունից Առաջին Նախագահի «կենտրոնական գրասենյակի» հանդես գալը,
- չճանաչել Ս.Սարգսյանին ՀՀ նախագահի պաշտոնում և նախաձեռնություններ իրականացնել այդ ուղղությամբ,
- Հայտարարել, որ ԲՀԿ-ին ընդդիմություն չի համարում,
- ՀԱԿ ԱԺ պատգամավորության խմբակցությունից հեռացնել Ա.Մանուկյանին, Գ.Ջհանգիրյանին և Լ.Սարգսյանին,
- Առաջին նախագահին հաստատել ՀԱԿ պատվավոր նախագահի պաշտոնում, առանց որևէ գործնական իրավունքների,
- Ն.Փաշինյանին նշանակել ՀԱԿ ղեկավարի պաշտոնակատար և առաջարկել նրա թեկնածությունը ՀՀ նախագահի առաջիկա ընտրությունում,
- Վերացնել «ՀԱԿ համակարգող» ինքնակոչ պաշտոնը,
- Ընդունել ՀԱԿ կանոնակարգ հռչակագրային ՀԱԿ-ի շրջանակներում,
- Լիովին համալրել Երևանի ավագանու ՀԱԿ խմբակցությունը,
- Նախաձեռնել համահայկական քննարկումներ առաջիկա ընտրությունների ազատ ու արդար անցկացման ուղղությամբ…»:
«ՄԻ-96» Կուսակցության վարչություն
