Հյուսիսային Կորեան որոշել է «թալանել» Ռուսաստանին
Հյուսիսային Կորեայի Ժողովրդավարական Հանրապետությունը ռուսական գազի տարանցման համար դեպի Հարավային Կորեա պահանջել է 2-3 անգամ ավելի թանկ գին, քան եվրոպական երկրները։ Այս մասին գրում է «Չոսոն Իլբո» թերթը՝ հղում անելով կորեական իր աղբյուրներին։
Ներկայումս բանակցություններ են ընթանում՝ ՀԿԺՀ-ի տարածքով անցնող տարանցիկ գազամուղ կառուցելու համար։ Թերթի տվյալներով, Հյուսիսային Կորեան գազի տարանցման համար Մոսկվայից պահանջում է տարեկան 300-500 միլիոն դոլար։ ՌԴ-ն Ուկրաինայի տարածքով գազ է մատակարարում եվրոպական երկրներին, և ուկրաինական համադրելի գներով տարեկան վճարը պետք է կազմեր շուրջ 150 միլիոն դոլար։
Ի դեպ, նախորդ տարվա վերջին Հեռավոր Արևելյան Դաշնային օկրուգում ՌԴ նախագահի ներկայացուցիչ Վիկտոր Իշաևը գնահատել էր, որ ՀԿԺՀ-ն գազի տարանցումից կարող է ակնկալել տարեկան 100 միլիոն դոլարի եկամուտ։ Իշաևն ասել էր, որ դա բավականին մեծ գումար է մի երկրի համար, որի ՀՆԱ-ն ընդամենը 10 միլիարդ դոլար է։
Սակայն, ինչպես երևում է, ռուսները թերագնահատել են հյուսիսկորեացիների ախորժակը։ Թե այդ ախորժակը որքանով կբավարարվի՝ կերևա բանակցությունների ավարտից հետո։
